Link açıqlığı

Saatnıñ esas haberi

«Elektrik aqımını qullandılar»: Qırımda «gaz borusında diversiya davası»nıñ daa bir mabüsi iskenceler aqqında aytıp berdi


Advokat İslâm Velilâyev
Advokat İslâm Velilâyev

Aqmescit civarındaki Anğara (Perevalnoye) köyü yaqınlarında «gaz borusında diversiya yapqanından» şübheli sayılıp apiske alınğan Aziz Ahtemov tutulğan soñ FSB hadimleri tarafından iskencelerge oğratılğanını bildirdi. Bunı Qırım.Aqiqatqa Ahtemovnıñ advokatı İslâm Velilâyev aytıp berdi.

«Tünevin (sentâbrniñ 24-nde – QA) onen körüştim. FSB-niñ tahqiqat idaresinde müşterimni körip oldım. Onen şahsen körüştim, laf ettim, davanıñ vaziyeti aqqında soradım. Oña nisbeten kösterilgen qabaatlarnı tanımağanını tasdıqladı. Ayrıca, iskencelerge oğratılğanını tasdıqladı – qol buğavı ve başında çuval ile tutuldı, köteklendi, elektrik aqımı qullanıldı. Böyle basqı altında da o suçunı itiraf etti», – dedi Velilâyev.

Qırımda «gaz borusında diversiya yapqanından» şübheli sayılıp apiske alınğan Asan Ahtemov tutulğan soñ birden aqımnen işkencege oğratıldı, dep bildirdi, dep haber ete Azatlıq Radiosı Ahtemovnıñ ikâyesine esaslanıp. Onıñ ikâyesi «Gratı» saytında derc etildi.

Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.​ ​Advokat Nikolay Polozovnıñ sentâbrniñ 8-nde bildirgenine köre, imaye Rusiye kontrolindeki Aqmescit mahkemesiniñ qırımtatar faali Nariman Celâlnı apiske almaq qararını şikâyet etti.​

Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.

FSB, diversiyanı «Ukraina Mudafaa nazirliginiñ Baş istihbarat idaresi teşkil etti», dep israr ete.

Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.

Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.

Ukraina Tış işler naziri Dmıtro Kuleba sentâbrniñ 6-nda Ukrainanı ziyaret etken Amerika kongressmenlerine Qırımda keçirilgen yañı tintüv ve tutuvlar aqqında tarif etip, olarnı yarımadada basqılarnı toqtatmaq maqsadınen Kremlge qarşı basqı quvetleştirüvde yardım etmelerine çağırdı.

Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.

Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG