Qırımtatar faali Edem Bekirovnıñ fikirince, iyünniñ 9-nda Aqmescitte oña qarşı çıqarılğan ğıyabiy ükümniñ maqsadı «halqnı qorquzmaq» ola.
Bu aqta o, Qırım.Aqiqatqa bildirdi.
«Rusiye mahkeme sisteması kerçek betini kösterdi. Tünevin prokuror 4 yıl istedi, bugün endi 7 yıl berildi – bir gece daa 3 yıl apis ketirdi. İnsanlar böyle uzun apis cezalarına üküm etilse, şimdi anda bulunğan insanlar aqqında ne aytmaq mümkün? Qanunsız mahküm etilgen 105 insan bar. Şunıñ içün dünyada bu devletnen laf etmege ya da bir iş yapmağa kimse istemey. Böyle apis cezaları halqnı qorquzmaq içün berile, dep tüşünem: «yavaş oturıñız, qıbırdasañız, ğıyabiy şekilde bile apis cezalarıñıznı çıqarırmız». İstinaf şikâyetini berecekmiz. Men azatlıqtam ve bu eñ müimi. Kerçek yüzüni köstermek içün ğıyabiy apis cezalarını bermelerine pek yazıq», – dep qayd etti Bekirov.
Yedi yıl apis cezası ve 150 biñ ruble para cezası – çarşenbe künü, iyünniñ 9-nda, Aqmescitteki mahkeme Qırımda ğıyabiy şekilde mahkeme etilgen qırımtatar faali Edem Bekirovnıñ davası boyunca üküm çıqardı.
Ukraina Yuqarı Radasınıñ insan aqları vekâletlisi Lüdmila Denisova Bekirovğa çıqarılğan ükümni takbih etip, halqara toplulıqnı «Rusiyege basqı yapmağa» devam etmesine çağırdı.
Rusiye kontrolindeki qabaatlayıcı Aqmescitte ğıyabiy şekilde mahküm etilgen qırımtatar faali Edem Bekirovnı dört yıl umumiy rejim koloniyasında qalmasına ve 200 biñ ruble para cezasını ödemesine üküm etmege talap etti.
İmaye ükümge razı degil ve istinaf şikâyetini bermege planlaştıra, dep bildirdi.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Eski siyasiy mabüs, qırımtatar faali Edem Bekirovnıñ cinaiy davası fevralniñ 19-nda Aqmescitte temelden baqılıp başlandı.
Edem Bekirov davası
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
