Yedi yıl apis cezası ve 150 biñ ruble para cezası – çarşenbe künü, iyünniñ 9-nda, Aqmescitteki mahkeme Qırımda ğıyabiy şekilde mahkeme etilgen qırımtatar faali Edem Bekirovnıñ davası boyunca üküm çıqardı, dep bildire Qırım.Aqiqat mühbiri.
Onıñ malümatına köre, Rusiye akimiyeti kontrolindeki Aqmescitniñ Merkeziy rayon mahkemesinde oturışuv ve üküm seslendirilüvi qapalı rejimde keçti. Qararnı qadı Sergey Demenok seslendirdi.
Advokatlar oturışuvğa kelmedi, diñleyiciler mahkemege alınmadı, çünki yer yoq ve qadı ükümni odasında seslendirdi.
Bekirovnıñ advokatı Aleksey Ladinge çıqarılğan üküm aqqında mahkeme oturışuvınıñ kâtibi haber etti.
Ladin imaye ükümge razı degil ve istinaf şikâyetini bermege planlaştıra, dep bildirdi.
Rusiye kontrolindeki qabaatlayıcı Aqmescitte ğıyabiy şekilde mahküm etilgen qırımtatar faali Edem Bekirovnı dört yıl umumiy rejim koloniyasında qalmasına ve 200 biñ ruble para cezasını ödemesine üküm etmege talap etti.
Munaqaşalarda imaye Bekirovnıñ davası siyasiy ola ve dava malümatlarında olğan bir çoq zıddiyet bunıñnen bağlı, dep qayd etti. Advokat Aleksey Ladin qabul etilecek delillerden gizli şaat Memetovnıñ şaatlığını, silâ ve patlayıcı madde tapılğan yer baquv aktını ve bu çantada patron sarğılığında Bekirovnıñ parmaq izlerini tapqan biologik ekspertiza neticelerini çıqarmağa rica etti.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Eski siyasiy mabüs, qırımtatar faali Edem Bekirovnıñ cinaiy davası fevralniñ 19-nda Aqmescitte temelden baqılıp başlandı.
Edem Bekirov davası
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
