Kreml kontrolindeki Aqmescitniñ Merkeziy rayon mahkemesiniñ qadısı Sergey Demenok qırımtatar faali Edem Bekirovnı qıdıruvğa ilân etmege qarar aldı.
Bu aqta advokat Aleksey Ladin Qırım.Aqiqatqa tarif etti.
«Prokuror Edem Bekirovnı qıdıruvğa ilân etmege, sıñırlav tedbirini apiste tutuv olaraq belgilemege ve Bekirov tapılğance davanı toqtatmağa rica etti. İmaye cinaiy dava toqtatılmasından ğayrı, qalğan er bir talabına qarşı çıqtı. Mahkeme Bekirovnı Qırım prokuraturası mesül olğan qıdıruvğa ilân etmege qarar berdi. Mahkeme sağlığınıñ tibbiy taraflarına esaslanıp, sıñırlav tedbirini belgilemedi», – dedi Ladin.
Advokatnıñ aytqanına köre, eñ yaqın vaqıtta Bekirovnıñ qıdırıluvınen bağlı mahkeme qararını şikâyet etecek.
Bundan evel Qırımdaki Rusiye qadısı Edem Bekirovnı mayısnıñ 22-ne belgilengen mahkeme oturışuvına «zornen ketirmege» qarar berdi.
Daa evel berilgen malümatqa köre, Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
