Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı.
Bu aqta advokat Aleksey Ladin Qırım.Aqiqat mühbirine bildirdi.
«Aqmescitniñ Merkeziy rayon mahkemesinden qadı Sergey Demenkonıñ yardımcısı telefon etip, bu sene mayısnıñ 19-nda saba saat 10:30-da müvekkilim Edem Bekirovğa qarşı cinaiy davanıñ oturışuvı olacaq, dep bildirdi. Başqaca aytacaq olsaq, işbu dava yañıdan baqıla. Hatırlatam, o, Edem Bekirov «tolusınen tüzelgenine qadar» toqtatılğan edi», – dep tarif etti advokat.
Qırımtatar faaliniñ imayesi bu dava mahkemesini tekrar toqtatmağa talap etmege niyetlene.
«Bilgenime köre, Edem Bekirov deñişüv neticesinde azatlıqqa çıqqan soñ bir qaç kere ameliyat oldı ve reabilitatsiyada bulunğan edi. Şimdi bile hastahanede buluna, dep bilem. Şunıñ içün imaye Edem Bekirov sağlıq vaziyeti sebebinden mahkeme oturışuvlarına kelip olamağanına dair vesiqa bermege azır. Neticede mahkemeler tekrar toqtatılmalı», – dep añlattı advokat.
2019 senesi sentâbrniñ 13-nde Kreml kontrolindeki Aqmescitniñ Merkeziy rayon mahkemesi Edem Bekirovğa qarşı cinaiy dava baqıluvını başqa vaqıtqa qaldırğan edi.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
