Rusiye kontrolindeki qabaatlayıcı Aqmescitte ğıyabiy şekilde mahküm etilgen qırımtatar faali Edem Bekirovnı dört yıl umumiy rejim koloniyasında qalmasına ve 200 biñ ruble para cezasını ödemesine üküm etmege talap etti. Bu aqta Qırım.Aqiqat mühbiri bildirdi.
Qayd etilgenine köre, qabaatlayıcı ceza müddetini tutulğan künden saymağa rica etip, Bekirovnıñ deñişimden evel tahqiqat izolâtorında keçirgen vaqıtnı saymağa teklif etti.
Munaqaşalarda imaye Bekirovnıñ davası siyasiy ola ve dava malümatlarında olğan bir çoq zıddiyet bunıñnen bağlı, dep qayd etti. Advokat Aleksey Ladin qabul etilecek delillerden gizli şaat Memetovnıñ şaatlığını, silâ ve patlayıcı madde tapılğan yer baquv aktını ve bu çantada patron sarğılığında Bekirovnıñ parmaq izlerini tapqan biologik ekspertiza neticelerini çıqarmağa rica etti.
Bundan ğayrı, Ladin Bekirovnıñ taqip etilüvinen bağlı fikrini seslendirdi. Bu fikirge köre, Qırım işğal etildi ve, Jeneva şartnamesine köre, adliye mahsus qurulğan mahkemede olmalı, Moskva kontrolindeki Aqmescit Merkeziy rayon mahkemesiniñ ise bu davanı baqacaq vekâletleri yoq.
Advokat İslâm Velilâyevniñ munaqaşalarda qayd etkenine köre, müvekkili işkence şaraitlerinde tutuldı ve bu sağlığına pek tesir etti. Velilâyevniñ aytqanına köre, Bekirov qabaatını tanımay ve bu silânen bir alâqası yoq. İmaye Edem Bekirovnı aqlamağa rica ete. Üküm iyünniñ 9-nda saba 10-nda çıqarılacaq.
Eski siyasiy mabüs, qırımtatar faali Edem Bekirovnıñ cinaiy davası fevralniñ 19-nda Aqmescitte temelden baqılıp başlandı. Bundan evel Qırım Yuqarı mahkemesi evelki instantsiya mahkemesiniñ qararını deñiştirmeyip, eski siyasiy mabüs, qırımtatar faali Edem Bekirovnı qıdıruvğa ilân etti.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirov davası
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
