Link açıqlığı

Saatnıñ esas haberi

"Dua etmekni devam etip, yañı yağmurlarnı beklemege qala" ‒ Qırım matbuatınıñ taqrizi


Qırım gazetaları yarımadanıñ suv teminatı meselesi aqqında, "Yalta-1945: tarih dersleri" konferentsiyasınıñ çalışıp başlağanı aqqında ve Aqmescitte park yerleri aqqında yaza

"Krımskaya pravda" ("Qırım aqiqatı") gazetası "Qırım kene suvsız. Er şey Aqyarğa ketti" maqalesinde yarımadada suv teminatı vaziyeti aqqında tarif ete. "Bu künleri yarımada yağmurlar yağdı. Amma olar vaziyetni emiyetli derecede yahşılaştırmadı", - yaza matbuat. Gazetalar yaza ki, Qırımda suv teminatı riskleri er vaqıt bar, çünki suv anbarlarınıñ toldurılması ava şaraitine bağlı özenleriniñ tabiy aqınına esaslana. Aqmescitte atta suv techizatı ile bağlı sıñırlavlarnı kirsetmek istediler, amma bunı yapmadılar.

Yağmur ve qar şeklinde yağanaqlar vaziyetni deñiştirdi. Qırım gidrometeorologiya ve etraftaki müitniñ monitoringi boyunca idaresinden berilgen malümatqa köre, fevralniñ 11-inde Yaltada aylıq normasınıñ 50%-ı, Ay Petride aylıq normasınıñ 35%-ı yağdı. Ay Petri üstünde qar örtüsiniñ yüksekligi 31 sm oldı. Amma yalıñız Aqyar sakinleri quvana bile. Yağanaqlar Çorğuna suv anbarını toldurğan Belbek ve Çorğuna özenlerinde suvnıñ miqdarını arttıracaq. "Onıñ içün qırımlılarğa quvanmağa daa erte. Dua etmekni devam etip, yañı yağmurlarnı beklemege qala", - yaza gazeta.

"Krımskiye izvestiya" ("Qırım haberleri") gazetası ​Livadiya saray müzeyinde "Yalta-1945: tarih dersleri" Halqara konferentsiyası çalışıp başlağanı aqqında haber ete. "O, Qırım (Yalta) konferentsiyasınıñ 75 yıllığına bağışlanğan, ve bu yubiley tamam vaqtında oldı. Ğarbiy siyasetçiler ve tarihçılar sanki sersem oldı. Tarihnı yañıdan yazmaq ıntıluvları paranoya tutuvlarına çevirildi. SSSRni artıq bir manalı şekilde Ekinci Cian Cenkiniñ sebepçisi kibi ilân ettiler. Bunı, bosslarnıñ emrini ömürge keçirip, elçilik işçileri bile tekrarlay. Böyle vaziteyette yañı bir Yalta konferentsiyasını çağırtmaq, Rusiye ile başlıqta dünyanıñ beş eñ müim memleketniñ liderlerini davet etmek ve adaletli tarih urğularını qoymaq kerektir", - yaza gazeta. Yaltadaki bu konferentsiyanı Rusiye Federatsiya Şurası, Qırım akimiyeti organları, Tarih fondu, Avrasiye halqlarınıñ birleşmesi ve Livadiya saray müzeyi teşkil etti.

"Krımskiy telegraf" ("Qırım telegrafı") gazetası Aqmescitte park yerleriniñ yetmemezligini ve qanunsız turaqlarnıñ olmasını aydınlata. "Park yerleriniñ yetmemezligi aydavcılar içün degil de, piyadeler içün büyük bir problema oldı. Maşnalarnıñ çoqunı qaldırımlarda ve piyade zonalarında qaldıralar. Er yerde turğan maşnalarnıñ sırasından keçmek qıyın, mıtlaq esli adamlar ve bala arabasınen yürgen analar içün", - yaza matbuat. Şeer akimiyeti problemanıñ bar olğanını tanıy. Ve onı çezmege bile tırışa. Bu yıl Aqmescitte bir qaç yañı turaq peyda oldı. Amma aynı vaqıtta, gazeta qayd etkeni kibi, Aqmescit park turaqları, çoqusı alda, ğayet qurnaz erbaplarnıñ zenginleşmesi içün hızmet ete".

"Qırım İİN-nde - cinaiy davanıñ tahqiq etüvi çerçivesinde - "GorTransServis" şirketi müdiriniñ tutulması aqqında haber ettiler. Er kün park etken maşnalardan cıyılğan aqçalarnıñ büyük miqdarı kassadan tış keçirile edi, - yazıla maqalede. - Portaqal renkli yelekte park ödevini alğan "turaq hadimi" kibi aqılsızlıq Aqmescitten ğayrı başqa yerde qalmağan, ğaliba. Medeniyetli memleketlerde aydavcılar, telefon qullanımını qullanıp, paranı birden büdjetke töley. Biraz azca medeniyetleşken ülkelerde onı mahsus cihazlar qabul ete. Amma Qırımnıñ paytahtında XXI asırda semereli olmağan para aluv sistemasını desteklep, qaznadan para hırsızlanmasına qol tutalar".

XS
SM
MD
LG