Rusiye FSBsi tarafından silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirov tutulğan Aqmescit SİZOsında qızamıq qırğınlığı başladı, dep bildirdi Ukraina ombudsmeni Lüdmila Denisova.
Onıñ qayd etkenine köre, qızamıq olğanlarnı SİZOdan Edem Bekirov bulunğan tibbiy bölükke avuştıralar. Bekirovnıñ qızamıq hastalığı yoq, amma «immunitet olmağanı içün hastalanuv telükesi yüksek».
«Edem Bekirovnıñ kritik sağlıq vaziyetine baqılsa, onıñ SİZOda qalması pek telükeli ola», – dep yazdı Denisova Facebookta.
Ukraina ombudsmeniniñ aytqanına köre, o, Rusiye insan aqları vekâletlisi Tatyana Moskalkovağa muracaat etip, «Avropa insan aqları mahkemesiniñ Edem Bekirovnı acele hastahanege yatqızmaq qararını» yerine ketirmege rica etti.
Moskalkova bu muracaatqa şimdilik açıq cevap bermedi.
Bekirovnıñ advokatı Aleksey Ladin müvekkiline «kerekli tibbiy yardım kösterilmedi», dep bildirdi.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
