Rusiye FSBsi tarafından silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ imayesi oña «kerekli tibbiy tetqiq yapılmadı», dep tüşüne. Bu aqta Bekirovnıñ advokatı Aleksey Ladin SİZOnıñ tibbiy bölük hadimlerinen laf etip, Qırım.Aqiqat mühbirine bildirdi.
Advokatnıñ aytqanına köre, Bekirov SİZOnıñ tibbiy bölüginde buluna. Yarın imayesi onı ziyaret etmege planlaştıra.
«Bugün tahqiqat izolâtorınıñ tibbiy bölük hadimlerinen laf ettim. Olarnıñ aytqanına köre, tünevin Bekirov Semaşko şeer hastahanesiniñ endokrinologı ve Aqmescitniñ kardiologik merkeziniñ kardiologına çıqarılğan edi. Tetqiq neticelerine köre, ekimlerniñ aytqanına köre, imayege daa bir şey berilmedi, Bekirovnıñ sağlığı o qadar yahşı ki, kâinatqa yibermege mümkün», – dedi Ladin.
Advokat Cezalarnı yerine ketirüv federal hızmeti reberliginden ve SİZO tibbiy bölüginden Bekirovnıñ çıqarılması içün sebep olğan vesiqalar ve tetqiq neticelerini istedi.
«İmayeniñ büyük şübheleri bar. Bir qaç ay devamında kardiolog ve endokrinologdan ğayrı, nevrolog celp etilmeli, dep israr etemiz, çünki insannıñ SİZOda tutulması içün mania olğan ciddiy bir nevrologik hastalığı bar; hirurg ve hirurg-ortoped kerek, çünki Bekirovnıñ areket apparatında problemleri bar; pulmonolog kerek, çünki aqciger problemleri bar. Bu ekimlerden iç birisi tetqiq içün celp etilmedi», – dedi Ladin.
Advokatnıñ qayd etkenine köre, Avropa insan aqları mahkemesiniñ qararına binaen, Bekirovğa «kerekli tibbiy tetqiq ve tedaviylev yapılmalı».
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
