Qırım gazetaları Qırımnıñ Cenübiy yalısındaki parklardan birisine paalı biletler aqqında, Sudaqtaki çaqıl karyeri etrafındaki dava aqqında ve taksistniñ insafsız areketi aqqında yaza.
"Qırım aqiqatı" ("Krımskaya pravda") "Oligarhlar içün park" maqalesinde Partenitteki Ayvazovskiy adına parktaki (Qırımnıñ eñ yahşı parklarından sayılğan birisi) inanılmaz yüksek bilet fiyatları aqqında yaza. "Mında foto çeküvler içün acayip meydançıqlar pekitildi, sessiz raatlıq sevgenler içün tena köşeçikler bar, deñiz yalısına çıqmaq mümkün. Ve bütün bular içün şimdi adam başına 1200 ruble tölemek kerek. Orta mevsimde, sentâbrniñ 1-inden 30-ınace, adam başına 800 ruble. Ve oktâbr 1-inden dekabr 31-inece parkqa 600 rublege kirmek mümkün, - qad ete gazeta. - Bu fiyatlar kim içün - ritorik bir sualdir. Amma belli ki, qırımlılar içün degil. Bundan da ğayrı, büyük qorantalarnıñ balaları ve pensionerler içün yapılğan endirimler mısqıl kibi körüne. 10 biñ rublelik pensiyanı alğan bir adam parknı ziyaret etmek içün 600 ruble masraf etip olamı? Elbetteki yoq. Büyük çoq balalı qorantalarda üçten çoq evlât ola. Ana-babasız kezinti içün 1800 rublemi?"
"Qırım telegrafı" ("Krımskiy telegraf") "Karyer qayta" maqalesinde Sudaqtaki dava aqqında yaza. Yerli cemaat Çaqa Taş dağınıñ yanında çaqıl çıqarmaq yañı ıntıluvlarına açuvlandı, amma o yerge eñ yaqın köyniñ adamları iş yerlerni peyda olmasına quvandı. Faaller, çaqıl çıqarması ekologiyağa zarar ketirecek ve Aqmescit memuriyetiniñ mülkiyetinde olğan bala lagerini yoq etecek, dep saya. Qırım Ekologiya Nazirligi, meseleniñ bölge sakinleriniñ faydasına çezilecegini ayttı. Bir qaç kün evel belli oldı ki, Qırım Ham Maden olmağan Şirketi, yañıdan ocaqnıñ inkişafı planarınıñ icrasına qaytmaq niyetindedir ve bu mevzuda artıq yerli sakinlerniñ destegine muracaat ete. Ve aynı zamanda, sualler peyda olmasın dep, bala lageriniñ Aqmescit reberliginen bir kompromiske añlaşmağa tırışa.
"Komsomol aqiqatı. Qırım" ("Komsomolskaya pravda. Krım"), raatlanıcılardan Yaltağace yol içün para alıp, amma olarnı çölde qaldırğan taksi aydavcısı aqqında yazdı. "Mariya ve Oleg ufaq balanen Bel Avuz belinde bir afta raatlandı. Soñra turistler ğarbiy yalıdan cenüpke ketmege istedi ve Yaltağa yol aldılar. Taksi çağırdılar, bütün kerekli şeylerni topladılar, - yaza gazeta. - Yolculıqnıñ başından berli aydavcı qorantadan nege kelgenlerini, mesken ve yürmelerge ne qadar masraf etkenlerini sorap bezdire edi. Tatillerini kapikkece saydı ve toqtamayıp "Ukraina vaqtında yahşıca edi" dep ayta edi, onıñ bütün problemalarında ise tamam Mariya, Oleg ve olarnıñ bir yarım yaşındaki qızları qabaatlı edi. Aydavcınıñ arsız alıp baruvına dayanıp olamağan Mariyanıñ aqayı, şikâyetlerni toqtatmaq ve balağa ava tiymesin dep, konditsionerni yavaşlatmağa rica etti. Taksist bu ricağa qızdı". Bundan soñ aydavcı yol ücretini alıp (4500 ruble). yolcularnı maşnadan çıqardı ve qorantanıñ bütün şeylerini çölge attı. Turistlerni o yerden keçken traktor aydavcısı kördi ve başqa maşnanı çağırttı. "Yahşı ki, böyle adam bar, taksi aydavcısı ise - Qırım içün bir masqaralıqtır, bütün tatilni bozdı", - dedi Mariya.
