Qırım gazetaları Rusiye Kününe bağışlanğan merasimler aqqında ve yarımadanıñ suv teminatı aqqında yaza.
"Qırım haberleri" ("Krımskiye izvestiya") iyün 12-sinde Rusiye Künü munasebeti ile Qırımnıñ rusiyeli parlamentinde tantanalı körüşüv aqqında aytıp bere. Moskova nezaretindeki parlament spikeri Vladimir Konstantinov maruzanen çıqışta bulundı. "Qırımnıñ Rusiyege qaytarılması ğayesi qırımlılarnıñ aqlından iç çıqmay edi. Men bunıñ aqqında babamnen defarlarca laf ettim. O, bie vaqıtları Qırım kene rusiyeli olacağında emin edi. Aramızda öyle fikir bar edi ki, qaytuv - tarihiy adaletniñ kösterüvi kibi - ertemi-keçmi, ömrümiz boyu olmasa bile, amma ep bir olacaq. Amma taqdirde başqace oldı, bunı daa tez kördik. Ve biz buña azır edik", - hususan dedi Konstantinov. Toplaşuv vaqtında o, bayramğa bağışlanğan "Yararlı emek içün" ve "Ana-baba yararlığı" medallerini qırımlılarğa berdi.
"Qırım hazetası" ("Krımskaya gazeta") "Ulu ülkege manzara ile" maqalesinde, bu yıl koronavirustan sebep Rusiye Kününe bağışlanğan ananeviy kütleviy merasimler onlayn rejimde keçkenini qayd ete. Qırım interaktiv yarışlarnı, sual-cevap oyunlarını, fleşmovlarnı, kontserlerni ve müzeyler boyunca onlayn kezintilerni azırladı. Bundan ğayrı, sakinlerniñ pencerelerinde Rusiyege bağışlanğan resim ve yazılar körünip başladı. Bu adamlar "Rusiye pencereleri" bütünrusiye aktsiyasında iştirak ete. "Hususan ana-babalarnıñ balalar ile pencere yaraştımasına diqqat ayırıla, çünki Vatanğa sevgi qorantadan başlana", - yaza gazeta.
"Qırım telegrafı" ("Krımskiy telegraf") "Eñ tübünde" maqalesinde yarımadanıñ suv teminatı meseleleri aqqında haber ete. "2020 senesi, Qırım ükümetiniñ malümatına köre, soñki 150 yıl içinde yarımadanıñ eñ quru yılı oldı. Özen ve suv anbarlarında suv seviyesi pek az oldı - tahmin etilgen ara-sıra yağanaqlar bu acınıqlı aldan qurtarmaz. Alimlerge köre, kelecek aylarda Qırımda qurğanlıq başlana bile. Amma akimiyet, qasevet etmekke iç sebep yoq, dep qandıra", - qayd ete matbuat. Meteorologlarnıñ malümatına köre, vaziyetni yalıñız küçlü yağmurlar qorçalay bile. Amma olar birden bütün yarımadada yağmalı, hususan, Qırım dağlarında - özen başları olğan yerlerde. O zaman yapma göller keregi qadar suvnen tolar edi.
