Qırım.Aqiqat qırımtatar faali Aziz Ahtemovnıñ avgustnıñ 29-nda Rusiye kontrolindeki Qırım Yuqarı mahkemesiniñ oturışuvında soñki mahkeme sözüni derc ete.
AQMESCİT – Birinciden halqıma, yaqınlarıma ve mahkemelerge kelgen ve imayecilerimizden aqlav ükmü aqqında haber almağa ümüt etken lâqayt olmağan er kesken teşekkürlerimni bildirmege isteyim. Tahminen 40 mahkeme oturışuvını kördik: ne qadar qoltutalar, bizge ve adalet mıtlaqa yeñecegine ne qadar işanalar.
2021 senesi sentâbrniñ 6-nda sıñırlav tedbiri belgilengen mahkeme oturışuvına bir qaç yüz insan kelgen edi, olar qabaatsız olğanımızdan emin ediler. Bütün dünya Rusiye Federatsiyasınıñ akimiyeti qabaatsız insanlarnı qanunsız mahkeme etkenini köre.
Bir şey belli: bu dava bütünley sahte, çünki cevaplardan çoq sual bar. İnsanlar kerçekten cinayet yapqan olsa, deliller olsa, ne kerek işkencege oğratmağa? Qabaat tanılğan şaatlıq alınğan soñ advokatlar ne içün kirsetilmedi, olarğa bizni qorçalamağa ne içün bermediler?
Bizni nege iqna etecek olalar? İşkence norma olğanınamı? Siz işkencege oğratıldıñızmı? Yaqınlarıñız öldürilir dep qorquzdılarmı? Azırlanğan insanlar bile buña dayanamay ve işkence altında yapmağanlarını aytmağa ve qabaatlı olğanını tanımağa başlaylar.
Bizni nege iqna etecek olalar? İşkence norma olğanınamı?
8 yıl devamında FSB işiniñ canavar usullarını köremiz. Qırımtatar halqına kene iftira atmaq içün tek olarğa kelişken malümatnı aqiqat olaraq tanıtalar. Terazeniñ bir tablasında akimiyet istegeni içün apiste qabaatsız yatqan insanlar, digerinde yañı rutbe almaq ve ükümdarlarından alğış almaq içün insannı apiske atqan akimiyet olsa, nasıl bir adalet lafı ola bile?
İlk tahqiqat devamında, FSB hadimleriniñ qanunsız areketleri ve prokuror ve qadınıñ bir taraflı areketleri neticesinde olar kerçekni bilmek ve qanunnı qorumaq içün degil, siyasiy sımarışnı yerine ketirmek içün çalışalar, dep tüşündim. Tek biz degilmiz. İç biriñiz Qırımdaki mahkemelerniñ işini, hatalarını, cellât kibi qabaatsız insanlarnıñ ayatlarını yoq etkeniñizni bir vaqıt tanımaycaq.
Oturışuvdan soñ balalarıñız, qorantalarıñızğa baracaqsıñız, belki, o qadar rezonans çıqarğan davanı bitirgeniñiz içün çoqtan istegen rutbeñizni ve mukâfatıñıznı alırsıñız. Bizim balalarımız ise bizni evde bekley. Bir yıldan berli baba sevgisini ve vasiyligini körmeyler. Bizni ailelerimiz, ömür arqadaşlarımız, esli-başlı ana-babalarımız bekley.
Ne içün az iqtidar alğan insanlar er şeyni yapa bile, diger insanlarıñ taqdirini belgiley, olarğa kerek olğanını yaptıra ve işkencege oğrata bile dep tüşüne? Halqnı tuvğan toprağından quva, başqa fikirde olğanları apiske ata?
Amma biliñiz: aqiqatta, halqımıznıñ birliginde ve sözümizde quvet bar
Bu sistemañıznıñ zayıflığını köstere ve isbatlay, sistemañız böyle çalışa: iqtidar kimniñ olsa – o aqlıdır! Amma biliñiz: aqiqatta, halqımıznıñ birliginde ve sözümizde quvet bar. Biz ise aqiqatqa irişecekmiz. Belki, biraz insafıñız olsa, içiñizde aqlı olğanımıznı añlaysıñızdır, amma siz qoy terisinde olğan qaşqırlarnıñ reinesisiñiz ve alımız bizimkinden yahşı degildir.
Allahnıñ peyğamberi aytqanı kibi, üç qadıdan biri cennetke, ekisi ceennemge kirecek. Aqiqatnı bilgen ve oña köre areket etken qadı cennetke kirecek. Ceennemge kirgenlerden biri aqiqatnı bilip, oña köre areket etmegen, ekincisi ise aqiqatnı bilmegen ve bilmeyip qarar çıqarğan olacaq.
Şunıñ içün er bir insan yapqanlarından mesüliyetlidir!
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
