Qırımnıñ Rusiye akimiyeti Avropa insan aqları mahkemesiniñ iyünniñ 11-nde qabul etken qararını yerine ketirip, qırımtatar faali, birinci derece saqatı Edem Bekirovğa kerekli tibbiy yardım köstermek kerek.
Bu aqta Ukrainanıñ Viyana halqara teşkilâtlardaki daimiy vekili İgor Prokopçuk OSCE Daimiy şurasınıñ toplaşuvı vaqtında ayttı, dep bildire «Ukrinform» ukrain haber agentligi.
«Rusiye işğalci akimiyeti eñ çoq ihtiyacı olğan Ukraina vatandaşlarına kerekli tibbiy yardım köstermemege devam ete. Avropa insan aqları mahkemesiniñ iyünniñ 11-nde çıqarğan qararına baqmadan, olar qırımtatarı, birinci derece saqatı Edem Bekirovnı hastahanege yollamay», – dedi o.
Prokopçuk çetel eyyetlerine Rusiye ilhaq etken Qırımda «qırımtatarlar ve ukrainlerge qarşı siyasiy taqipler devam ete», dep hatırlattı.
Avropa Birliginiñ OSCE missiyası da işğal altındaki Qırımda insan aqları vaziyeti kerginleşkeninden qasevetlengenini bildirdi.
«Qanunsız ilhaqqa qarşı çıqqanlarnıñ, hususan qırımtatarlarnıñ, taqip etilüvi acele toqtamalı. Rusiye bunı toqtatıp, qanunsız şekilde tutulğan bütün Ukraina vatandaşlarını azat eter, dep bekleymiz. Avropa Birligini tutulğan faal Edem Bekirovnıñ sağlığı fenalaşqanı pek qasevetlendire. Oña kerekli tibbiy yardım kösterilecek, dep bekleymiz, Avropa mahkemesi bunıñnen bağlı qarar alğan edi. Yarımadada halqara standartlarğa tolusınen riayet etilmesine çağıramız», – dep bildirdi AB OSCE temsilcileri.
Rusiye FSBsi tarafından silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ imayesi oña «kerekli tibbiy tetqiq yapılmadı», dep tüşüne. Bu aqta Bekirovnıñ advokatı Aleksey Ladin SİZOnıñ tibbiy bölük hadimlerinen laf etip, Qırım.Aqiqat mühbirine bildirdi.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
