Avropa birligi Rusiyege qarşı Ukrayinağa qarşı tecavuzı içün sanktsiyalarnı altı ayğa uzattırdı. Avropa Birligi Şurasınıñ saytında bildirilgeni kibi, sıñırlavlar 2025 senesi yanvar ayınıñ soñuna qadar devam etecek.
"2014 senesi ilk sefer tayin etilgen bu sanktsiyalar 2022 senesi fevral ayından itibaren Rusiyeniñ Ukrayinağa qarşı provokatsiyağa oğratılmağan, sebepsiz ve qanunsız arbiy tecavuzına cevap olaraq bayağı kenişletildi", — dep aytıla haberde.
Sanktsiyalar, ticaret, maliye, tehnologiya ve eki taraflı qullanılğan mallar, sanayı, naqliyat ve lüks mallarğa sıñırlavlarnen beraber, keniş saa tedbirlerinden ibarettir.
Bundan ğayrı, sanktsiyalar, Rusiyeden Avropa Birligine deñiz naqliyatı vastasınen neft ve bazı neft mahsulatlarınıñ ketirilmesini yasaq ete, bir qaç Rusiye bankınıñ SWIFT sistemasını qullanmasını yasaq ete, Kreml tarafından desteklengen kütleviy haber vastalarınıñ Avropa Birliginde yayınlavını yasaq ete.
Bundan da ğayrı, konkret tedbirler Avropa Birligine sanktsiyalarnıñ bozuluvına qarşılıq köstermege imkân bere.
2022 senesi fevralniñ 24-nden itibaren AB Rusiyeniñ Ukrayinağa istilâsına cevap olaraq 14 sanktsiya paketini tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
