Aqyarda Rusiye tarafdarı cemaat teşkilâtları ve Moskva kontrolindeki şeer ükümetiniñ vekilleri mayısnıñ 18-nde avtovokzal yanındaki skverde qırımtatar sürgünligi qurbanlarınıñ abidesine çeçek qoydı.
Qırım.Aqiqat mühbiri bildirgenine köre, merasim iştirakçilerinden biri abide yanında bir qaç saniyege qırımtatar bayrağını açıp köterdi.
Çeçek qoyğan soñ Aqyar ükümetiniñ başı Mihail Razvojayev ve şeer parlamentiniñ spikeri Vladimir Nemtsev şeerniñ milliy-medeniy cemiyetleriniñ reberlerinen laf etti, jurnalist ve cemaatçılar etraflarını sardı, şeer sakinlerine akimiyetniñ emrinen belgilengen bir metrlik mesafe bozuldı.
Çeçekler qoyulğan soñ abide yanında dua oqudılar, anda bir qaç qırımtatar faali bar edi.
Bazı tedbir iştirakçileri sürgünlik qurbanlarınıñ abidesi restavratsiyağa muhtac, dep qayd etti.
Qırımnıñ Qurman qasabasında mayısnıñ 18-nde qırımtatar milliy areketiniñ faalleri genotsid qurbanlarını añdı: hatıra taşına çeçek qoyıp, dua oqudılar. Tedbir Rusiye quvetçileriniñ nezareti altında keçti. Aqmescitte tren vokzalındaki abide yanında sessizlik daqqası oldı. Rusiye politsiyasınıñ hadimleri operativ video çıqardı.
Rusiye kontrolindeki Qırımnıñ milletlerara munasebetler Devlet komiteti bildirgenine köre, qırımtatar sürgünliginiñ yılına bağışlanğan er yıllıq «Qalbiñde ateş yaq» aktsiyası bu yıl koronavirus pandemiyası sebebinde online yapılacaq. Qırımnıñ Rusiye akimiyeti, COVID-19 sebebinden bütün sanitar normalarına riayet etip, hatıra abidelerine çeçekler qoyulacaq, dep bildirdi.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
