Aqyarda (Sevastopol) mesken evde olğan yanğında bir adam elâk oldı, dep bildire Rusiye FVN-niñ baş idaresiniñ matbuat hızmeti.
Qaza yerine kelgen yanğıncılar, birinci qattaki kvartiradan tütün çıqqanını tayin etti.
"Yanğıncılar kiriş qapısını açqan ve hanege kirgen soñ, içinde eki adamnı tapqan ve tışarığa çıqarğan. Yanğınğa oğrağan bir adam soñra elâk oldı. Ekincisini ise hastahanege qoymaq içün ağır alda acele yardım taqımına berildi", - denile beyanatta.
Qayd etile ki, yanğın Aqyarda Pobedı caddesinde mesken evniñ kvartirasında oldı. Yanğıncılar ateşni 40 daqqada söndürdi.
"Yanğınnı 15 adam ve 5 tehnika söndüre edi", - dep bildirdiler FVN.
Qırımda yanvarniñ 5-inde altı yanğın oldı, bir adam elâk oldı.
Qurtarıcılarnıñ beyanatına köre, yanvarniñ 5-inde Qırımda İslâm Terek (Kirovskoye) rayonınıñ Cuma Eli (Privetnoye) köyünde bir aqay elâk oldı.
Yanvarniñ 2-sinde Aqmescitte (Somferopol) Stroiteley soqagında beş qatlı evniñ kvartiralarından birisinde yanğın çıqqanı içün, sakinlerni tahliye ettiler, eki adamnı qurtarıp ekimlerniñ eline berdiler.
Daa evel Canköy rayonınıñ Totay köyünde gece mesken evde yanğın oldı. Yanğında 1958 senesi doğma aqay zararlandı.
