AQMESCİT – Aqmescitte noyabrniñ 4-nde işğal ve ilhaq etilgen Ukrayına topraqlarınen dögülgen yañı Rusiye haritasını tekrara açqanlar. Qırımda Trenev parkınıñ çetinde Rusiye Federatsiyasında qayd etilgen Halq birligi kününde peyda olğan 15 tonnalıq demir haritası qoyulğanından tam dört yıl keçti.
2019 senesi olğanı kibi, «Qırım vaqtı» (şimdiki – «Rusiye vaqtı») propaganda şousına yarımadanıñ belli Rusiye memurları «ilham bergen». Keçken sefer yerli Rusiye ükümetiniñ reberi Yuriy Gotsanük yañı sanat obyekti «cumhuriyetimizniñ daa bir varaqası» olur, dep işandırğan edi. Şimdi Qırımnıñ Rusiye Devlet şurası spikeriniñ birinci muavini Yefim Fiks aynısını ayta. 76 yaşında istifada olğan polkovnik-polithadim dögülgeniñ «ululıq» timsalciligini yañartılğan haritada «yañı topraqlarnıñ», yani işğal etilgen Herson, Zaporijjâ, Lugans ve Donetsk vilâyetleriniñ peyda olmasında kördi.
«Rusiye demircileri gildiyaı» cemaat teşkilâtından 300 ustaz, olarğa 2022 senesinden soñ işğal etilgen dört Ukrayına regionından zenaatdaşları da qoşulğan eken, yañartılğan haritada Mertsalov palması şeklinde (Donetsk vilâyeti), qarpız ve lenger (Herson vilâyeti), atom (Zaporijjâ) ve terrikonlı kömürci (Lugansk vilâyeti) şeklinde kösterdi.
Añlaşıla ki, sımarış etkenlerniñ emirlerine tam riayet etildi ve Ukrayına vilâyetleri şimdiki memuriy sıñırlar çerçivesinde «demirnen dögüldi». Şaşacaq bir şey de yoq – tedbir programmasında qayd etilgen sımarışçı medeniy teşebbüslerge qoltuuv prezident fondu (Vladimir Putin – QA) demircilerniñ icadiy ilhamına beş million ruble berdi.
Söz sırası, birinci kere, yani dört yıl evelsi, ustazlarnıñ iş tehnikası ve tehnologiyası yahşı olmadı, daa doğrusı – iş keyfiyeti adiy yağanaqlarğa dayanamadı. Sanat obyekti açılğanından dört aydan soñ onı tot basıp başladı. Lâkin iştirak etken Murmansk demircilerinden biri Qırım.Aqiqat mühbirine eser «yahşı qorunğan ve bir korroziya olmaz», dep aytqan edi.
Haritağa yaqın, qarşıda, «Qırımnıñ varaqası» – ilhaqtan soñ açılğan «Halq opolçenleri» bronz abidesi üzerinde yaşı kiçik ve büyük vandallar yahşı «çalıştı». Ne de olsa, «Rusiye vaqtını» yapqanlar Aqmescitteki eserni bu sebepten yañartmaq kerek, dep ayta. Obyektni gece-kündüz olacaq video közetüvi qorumalı. Tot aqqında ise bir şey aytılmay.
Çoq tonnalıq eserniñ yañılığı aqqında. Bu sefer diger taraftan onı Rusiyeniñ timsali olğan dögülgen emen tuta, onıñ dalında til köstergen pardoş otura.
Emenniñ kevdesinde ise qanatında qırmızı «NATO» yazısınen süyrüsinek bar. Müelliflerniñ ğayeviy-bediiy mündericesi ya da hayal küçü nedir – tek tahmin etmek mümkün.
Haritanıñ arqasında ise, Trenev parkında, Aqmescit içün soñki yılları adiy olğan «bördür» künleri devam ete. Anda artıq bir timsal ve tantana yoq.
Leonid Hijnâk, qırımlı bloger (müellifniñ adı ve soyadı telükesizlik maqsadınen deñiştirildi)
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
MALÜMAT: Ukrayınağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.