Aqmescit SİZOsınıñ reberligi Aqmescitteki ekinci «Hizb ut-Tahrir davasınıñ» mabüsi Cemil Gafarovnıñ din kütme aqqını boza. Bu aqta advokat Rifat Yahin Qırım.Aqiqatqa bildirdi.
«Şimdi onı pek küçük kamerağa yerleştirgenler. Suvı yiberilmegen açıq kenefke baqılsa, anda namaz qılmağa çare yoq. İslâmda böyle şaraitler yasaqtır. Böyle şaraitlerni müvekkilimniñ din aqlarınıñ bozuluvı dep sayam», – dedi advokat.
Yahinniñ bildirgenine köre, müvekkiliniñ kamerası Aqmescit SİZOsına qarşı davanıñ «cevabı» ola.
«Bunı aşalav (SİZO hadimleri tarafından maneviy işkence şaraitlerinde insan itibarını aşalağan bir yer – QA) dep sayam. Dava açmazdan evel Gafarovnıñ şaraitleri yahşı edi», – dedi Yahin.
Advokatnıñ Qırım.Aqiqatqa bildirgenine köre, Gafarov Semaşko hastahanesine tibbiy tedqiqqe çıqarılğan edi. Bu Aqmescit SİZOsına qarşı dava açılğan soñ oldı.
«Apiske alınmazdan evel Gafarov 7-inci şeer hastahanesinde tedaviylengen edi, SİZOnıñ tibbiy bölügi bu hastahanege bağlı. Müvekkilimniñ hastalıqlarını isbatlağan vesiqalar olmasın dep, onı aselet Semaşko hastahanesine çıqarğanlar, dep tüşünem», – dep bildirdi o.
Aqmescit SİZOsınıñ reberligi haber derc etilgende advokat Rifat Yahinniñ malümatını daa izaatlamadı.
Yanvarniñ 16-nda olıp keçken qapalı oturışuvda qadı Cemil Gafarovnı apiste qaldırdı.
Aqmescitteki ekinci «Hizb ut-Tahrir davasınıñ» mabüsi Cemil Gafarov oktâbrniñ 25-nden berli Aqmescit SİZOsında kerekli ilâclar almay, dep bildirdi advokatı.
Yuqarı Radanıñ insan aqları vekâletlisi Lüdmila Denisova işğal etilgen Qırımdan ukrainalı siyasiy mabüsler Cemil Gafarov, Server Gaziyev, Enver Ömerov ve Asan Yanikovnıñ (Qırımdaki «Hizb ut-Tahrir davalarınıñ» mabüsleri) sağlıq vaziyeti fenalaşqanını bildirgen edi. Şu sebepten Denisova Rusiye ombudsmeni Tatyana Moskalkovağa muracaat etip, Ukraina vatandaşlarınıñ tibbiy tedqiqi içün yardım etmesini rica etti.
Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
