Qırımda yanvarniñ 16-sında Kreml nezaretindeki mahkeme qapalı şekilde keçken oturışta ekinci "Hizb ut-Tahrir davası"nıñ iştirakçisi Cemil Gafarovnı tevqif adtında qaldırdı. Bunı "Qırım birdemligi" cemiyet birleşmesi haber etti.
Qayd etilgeni kibi, bu mahkeme oturışında Gafarovnıñ advokatı Rifat Yahinniñ, müşterisiniñ apis müddetiniñ uzatılmasına apellâtsiya şikâyeti baqıla edi.
Gafarovnıñ advokatı Emine Avamileva Rifat Yahinniñ şikâyeti qoltuttı. Onda bayağı müim talaplar bar, amma esası - Gafarovnıñ sağlıq alı aqqında qasevetlev, çünki onıñ eki ağır hastalığı bar: 4-ünci stadiyada hronik büyrek hastalığı ve işemiya yürek hastalığı, bildire "Qırım birdemligi".
Noyabr 19-ında advokat Rifat Yahin, ekinci Aqmescit "Hizb ut-Tahrir davası"nıñ iştirakçisi Cemil Gafarovnıñ tibbiy tedqiqini yapmaq ricası ömürge keçirilmegeni içün Aqmescit SİZOsına qarşı dava açtı.
Yuqarı Radanıñ insan aqları vekâletlisi Lüdmila Denisova işğal etilgen Qırımdan ukrainalı siyasiy mabüsler Cemil Gafarov, Server Gaziyev, Enver Ömerov veAsan Yanikovnıñ (Qırımdaki «Hizb ut-Tahrir davalarınıñ» mabüsleri) sağlıq vaziyeti fenalaşqanını bildirgen edi. Şu sebepten Denisova Rusiye ombudsmeni Tatyana Moskalkovağa muracaat etip, Ukraina vatandaşlarınıñ tibbiy tedqiqi içün yardım etmesini rica etti.
Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı.
