İlhaq etilgen Qırımda advokat Rifat Yahinniñ Aqmescit SİZOsına qarşı açılğan davası boyunca mahkeme oturışınıñ kününi belgilediler. Oturış dekabrniñ 25-inde Rusiye nezaretindeki Aqmescitniñ Jeleznodorojnıy rayon mahkemesinde keçecek.
Bunı Yahinniñ özü Qırım.Aqiqat mühbirine aytıp berdi.
"Bu menim Aqmescit SİZOsına qarşı açılğan davam aqqında. O, müşterim Cemil Gafarovnen bağlı, onıñ, saqatlıq gruppasını tasdıqlamaq içün, tibbiy tedqiqini yapmaylar", - dedi o.
Daa evel bildirilgeni kibi, advokat Rifat Yahin, ekinci Aqmescit "Hizb ut-Tahrir davası"nıñ iştirakçisi Cemil Gafarovnıñ tibbiy tedqiqini yapmaq ricası ömürge keçirilmegeni içün Aqmescit SİZOsına qarşı dava açtı.
Daa evel Cemil Gafarovnıñ advokatı Rifat Yahin müvekkiliniñ sağlıq vaziyeti fenalaşqanı ve mabüsniñ aqları bozulğanı içün Rusiye ombudsmeni Tatyana Moskalkovağa muracaat etti.
Yuqarı Radanıñ insan aqları vekâletlisi Lüdmila Denisova işğal etilgen Qırımdan ukrainalı siyasiy mabüsler Cemil Gafarov, Server Gaziyev, Enver Ömerov veAsan Yanikovnıñ (Qırımdaki «Hizb ut-Tahrir davalarınıñ» mabüsleri) sağlıq vaziyeti fenalaşqanını bildirgen edi. Şu sebepten Denisova Rusiye ombudsmeni Tatyana Moskalkovağa muracaat etip, Ukraina vatandaşlarınıñ tibbiy tedqiqi içün yardım etmesini rica etti.
Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı.
