Advokat Rifat Yahin, ekinci Aqmescit "Hizb ut-Tahrir davası"nıñ iştirakçisi Cemil Gafarovnıñ tibbiy tedqiqini yapmaq ricası ömürge keçirilmegeni içün Aqmescit SİZOsına qarşı dava açtı.
Bunı Yahin Qırım.Aqiqat mühbirine aytıp berdi.
"Müşterim Gafarovnıñ tibbiy tedqiqi yapılmasından vazgeçüv, ve SİZO başınıñ onıñ keçirilmesi aqqında muracaatımnı baqmağanı neticesinede, areketsizlikni qanunsız tanımaq talabınen memuriy davanı açtım", - dep haber etti advokat.
O, noyabr 19-ında Aqmescitniñ Jeleznodorojnıy rayonınıñ rusiyeli mahkemesi memuriy davanı qayd etti, dep qoştı.
Şimdilik SİZO hadimleriniñ açıq tefsirleri yoq.
Daa evel Cemil Gafarovnıñ advokatı Rifat Yahin müvekkiliniñ sağlıq vaziyeti fenalaşqanı ve mabüsniñ aqları bozulğanı içün Rusiye ombudsmeni Tatyana Moskalkovağa muracaat etti.
Yuqarı Radanıñ insan aqları vekâletlisi Lüdmila Denisova işğal etilgen Qırımdan ukrainalı siyasiy mabüsler Cemil Gafarov, Server Gaziyev, Enver Ömerov veAsan Yanikovnıñ (Qırımdaki «Hizb ut-Tahrir davalarınıñ» mabüsleri) sağlıq vaziyeti fenalaşqanını bildirgen edi. Şu sebepten Denisova Rusiye ombudsmeni Tatyana Moskalkovağa muracaat etip, Ukraina vatandaşlarınıñ tibbiy tedqiqi içün yardım etmesini rica etti.
Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı.
