ABD Ukraina elçihanesi SSCB Stalin rejimi tarafından kerçekleştirilgen qırımtatar sürgünliginiñ yılına muracaat aydınlattı, dep haber ete Azatlıq Radiosı.
«Biñlernen insannıñ yarası, çekişüvi ve ölümine sebep olğan sovetlerniñ qırımtatar sürgünligi başlağanını kedernen hatırlaymız. Bu insanlar ve qorantalarınıñ başına kelgen belâ ölçenmez ya da aqlanmaz. Bu yara ve qasevetni Rusiyeniñ zemaneviy Qırım işğali quvetleştire. ABD qanunsız Qırım ilhaqını qabul etmeycek. Qırımnen bağlı sanktsiyalarımız Rusiye Qırım yarımadasını Ukraina kontroline qaytarğanına qadar devam etecek», – dep qayd etti Ukrainadaki ABD işlerinden vaqtınca mesül olğan Kristina Kvien.
O, Rusiyeni qırımlılarnı Rusiye ordusına almaqnı toqtatıp, «yarımadanı Ukraina kontroline acele qaytarmasına» çağırdı.
Ukraina prezidenti Volodımır Zelenskıy qırımtatar halqı genotsidiniñ yılında Rusiye işğal etken Qırım yarımadasınıñ Ukraina kontroline, qırımtatarlarnıñ ise tuvğan evlerine qaytacağına ümüt etkenini bildirdi.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
