Rostov-na-Donunıñ Cenübiy okrugınıñ arbiy mahkemesi «qırımlı musulmanlar davasınıñ» mabüsi Azamat Eyupovğa üküm çıqarıp, onı «terror teşkilâtınıñ faaliyetini teşkil etkeninde» qabaatladı ve 17 yıl sert rejimli koloniyada qalmasına qarar berdi. Azamat Eyupov sağlığı olmağanı içün munaqaşalardan vazgeçti («Qırım birdemligi» cemaat birleşmesiniñ malümatına köre, SİZOda adam 4 işemik insult keçirdi) ve qısqa soñki sözüni ayttı. Eyupov davası uydurılğanından emin olğanını bildirdi. Qırım.Aqiqat beyanatını derc ete.
Soñki söz – söz alıp, qabaatsız olğanımnı kösterecek ya da, aksine, qabaatımnı tanıycaq soñki fırsatımdır. Qabaatımnı tanımaycam, çünki cinaiy davam boş yerde uydurıldı – sesim olmağan bir sıra ses qaydı ve meni doğru tarif etip olamağan «gizli şaatlarnıñ» malümatı esasında. «Gizli şaatlar» yalancı ola, şunıñ içün de gizleneler. Qabaatsız olğanım temiz beyaz kâğıt kibi belli. Er kes bunı añlay ve bile.
Men, Eyupov Azamat Serveroviç, musulman, qırımtatarı, Ukrayına vatandaşı olam. Dünya toplulığv ve aq qorçalayıcı teşkilâtlar tarafından siyasiy mabüs olaraq tanıldım. 1944 senesi mayısnıñ 18-nde kerçekleştirilgen qırımtatar sürgünliginiñ aqibetlerinen keçken balalığımdan berli diniy terbiye aldım. Maña dinim İslâm, doğrulıq ve adalet, adaletsizlik ve zorbalıqnı qabaatlav ögretildi. Maña Qırım sevgisi, evimizge kene qaytmaq içün elinden kelgen er şeyni yapmağa ögretildi.
Qırımğa qaytıp, men qurucılıq şirketinde çalışıp başladım. Evlendim. Dört qızımız oldı, biri balalığından birinci derece saqatıdır. Ömür boy qorantam içün çalıştım. Amanlıqta yaşayıq, bir eksigimiz olmasın istedim, çünki babam olmağanı içün men bunı kördim. Şimdi ise balalarımnı babasız qaldıralar, maña iftira atalar, terrorist deyler.
2018 senesi iyulniñ 10-nda baba-oğul Ömerovlar tutulğan edi. Ömerovlar tutulğanda FSB hadimleri 100% bile edi ki, CD disklerde eki ses Ömerov Enverge ve oğlu Ömerov Rizağa ait, üçünci ses ise Mirpoççayev Rustamnıñdır. Ne de olsa, bunı bilip, 2021 senesi yanvarniñ 17-nde saba saat dörtte hadimler evime kirip, meni sebepsiz tuttı ve Aqmescitke alıp ketti. Qabaatlav malümatlarını incelegende maña men olmağan Şevçenko soqağındaki Ömerovnıñ evinde yapılğan ve sesim bar dep israr etilgen ses qaydı diñletildi. FSB tahqiqatçısı maña qarşı davanı bu ses qaydı esasında uydurdı.
Davamda eki gizli şaat bar, olar yalancılar, şunıñ içün gizli qalalar. Hadimniñ şaatlığı sebepsiz, o, bir delil köstermedi. Maña ve semetdeşlerime qarşı qabaatlavlar siyasiy sebepli ola. Uquq qoruyıcı organlarınıñ hadimleri halqımızğa iftira atmağa istey. Halqıma qarşı repressiyalar bundan ibarettir. Menim bir qabaatım yoq. Meni mahkemede azat etmege rica etem.
Azamat Eyupov – qırımlı, «qırımlı musulmanlar davasınıñ» mabüsi
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Maqaleniñ aslı – «Qırım birdemligi»
MALÜMAT: 2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
