Rostov-na-Donudaki Cenübiy bölgeniñ arbiy mahkemesi «Qırım musulmanları davasınıñ» mabüsi Azamat Eyupovğa üküm çıqardı. O, «terror teşkilâtınıñ faaliyetini teşkil etkeninde» qabaatlanıp, 17 yıl sert apis cezasına mahküm etildi.
«Qırım musulmanları davasınıñ» mabüsi Azamat Eyupov sağlıq vaziyeti sebebinden munaqaşalardan red etti ve iyülniñ 18-nde Rostov-na-Donudaki Cenübiy bölgeniñ arbiy mahkemesinde qısqa soñ çıqışını yaptı.
Eyupov cinayet davasınıñ sahte ve uydurma olğanından emin olğanını bildirdi.
Advokat Emil Kurbedinovnıñ sözlerine köre, Eyupovnıñ sağlığı SİZO-da pek zayıflaşqan: «Munaqaşalarğa azırlanmaq içün küçü yetmedi, alâ daa elinde qalem tutmağa qıyın, şunıñ içün soñki söz içün ir nutıq azırladı».
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.