Keriç köprü içün bir telüke barmı? Ukraina Qırımnen beraber bütün işğal etilgen topraqlarını keri alacaqmı? Qırımlılar bir şeyge azırlansınmı? Bu aqta Qırım.Aqiqat yayınında jurnalist Katerına Nekreça 2014 senesi ant sözüni tutıp, Qırımdan ketken arbiy ekspert, Ukraina silâlı quvetleriniñ albayı Vladıslav Seleznev ile laf etti. 2014 senesine qadar Vladıslav Ukraina Mudafaa nazirliginiñ Qırım media merkeziniñ yolbaşçısı olaraq hızmet etti. 2014 senesiniñ noyabr ayından başlap 2017 senesine qadar Ukraina Silâlı quvetleri Baş ştabı matbuat hızmetiniñ yolbaşçısı edi.
Cenk başlağan yerde bitecekmi?
«Ukraina ordusı Ukraina halqınıñ yardımınen memleketimizniñ bütün toprağını işğalciniñ çızmasından azat etkenine qadar cenkleşecek. Ğarbiy ortaqlarımıznıñ unikal yardımını köremiz. Hatırlatmaq isteyim ki, Ekinci cian cenkinden soñ Putinge qarşı koalitsiya bu şekilde ilk sefer toplana (bugünde-bugün onıñ erkânına tahminen 42 memleket kire), o, Ukraina ordusı, Ukraina halqınıñ toprağımıznı Rusiye işğalcilerinden azat etüv areketlerine qoltutmaq içün iqtisadiy ve arbiy ceetten yardım etmege azır.
Qırımnıñ taqdiri – daima biriniñ arbiy bazası olmaqmı?
«Mence, Rusiye işğalci akimiyeti bunı istey. Çünki olar XX, belki de, XIX asırnıñ kategoriyalarına köre fikir yürsete. Mantıqlısı şu ki, yüksek doğrulıqlı raketa silâsı biñlernen kilometrden çoq olğan mesafelerde çalışa bilgen zemaneviy şaraitlerde raketalar uçurılğan bir de bir arbiy bazanıñ coğrafik yerleşüviniñ iç müim degil. Şimdiki cenk çerçivesinde köremiz: Zakarpattâğa qadar memleketimizşge uçqan raketalarnıñ çoqusını rusiyeliler Hazar deñizinden uçura. Şunıñ içün coğrafik yerge baqmaq pek mantıqlı degil. Qırımnıñ yeri, yarımadadaki iklim alanlarına köre unikal olğanı bes-bellidir. Şübhesiz, bu regionnıñ raatlıq imkânlarını inkişaf ettirmek – arbiy infrastrukturağa para sarf etmekten daa müim ve istiqballidir.
Çünki, meselâ, ABD Silâlı quvetleriniñ «esminets» sınıflı bir qaç zemaneviy gemisiniñ işi sayılı saatlarda Tomahawk sınıflı yüksek doğrulıqlı raketalar yardımınen yarımadada bütün arbiy infrastrukturanı sıfırğa yoq ete bile. Rusiye generalları, Rusiye arbiy-siyasiy reberliginiñ Qırımnıñ olarğa ait olğanı ve anda batmağan uçaq gemisini yapqanlarını tüşüngeni, – bir saçmalıqtır. Zemaneviy yoq etüv vastaları çeşit mesafelerden çalışmağa azır, skalpel doğrulığı ve semereligi ile çalışalar».
Keriç köprü içün bir telüke barmı?
Yüksek doğrulıqlı zemaneviy silânen Ukraina ordusı mücize yarata bile
«Qırım köprü pek müim infrastruktura obyekti ola. Andan arbiy yük, arbiy tehnika ve (Ukrainadaki – QA) cenk uruşlarında iştirak etken Rusiye Federatsiyası silâlı quvetleriniñ askerleri keçe. Şunıñ içün onı bozmaq Ukraina Silâlı quvetleriniñ pek güzel strategik operatsiyası olur edi. Çünki Qırım köprü yıqılsa, Rusiye Federatsiyası logistik teslimatlar içün başqa küç ve vastalarnı qullanmağa mecbur olur edi. Amma kerçekçi olıp, añlamalımız ki, al-azırda Ukraina Silâlı quvetleriniñ elinde olğan vastalar bu vazifelerni semereli bir şekilde qullanmağa imkân bermey. Ve Ukraina Arbiy-deñiz quvetleriniñ celp etilüvinen bağlı diger leyhalarnıñ yerine ketirilüvi Qırım köprüni yoq etüv leyhasını yerine ketirmege imkân bermey. Amma er şeyniñ vaqtı bar. Cenk – pek dinamik şeydir. Bu yıl fevral ayınıñ soñunda Rusiye generallarınıñ memleketimizge qarşı arbiy macerasını başlatqanda keyflerini hatırlaymız. Şimdi Rusiye ekspertleriniñ keyflerini köremiz. Er angi siyasiy esnas, muzakere esnası, cenk neticeleri – uruş meydanında şekillene. Yüksek doğrulıqlı zemaneviy silânen Ukraina ordusı mücize yarata bile».
Dünyanıñ ekinci ordusı efsanesi bozula
«Ukraina askerleri o mifni yoq ete. Rusiye propagandası 30 yıl devamında bir mif uydurdı, Rusiye ordusı dünyanıñ ekinci küçlü ordusı, yeñilmez ve arbiy-siyasiy reberliginiñ er angi vazifesini yerine ketirecek imkânlarına saip degenler. Böyle olmağanı belli oldı ve devam etken uruşlar, yoq etilgen Rusiye işğalcileriniñ büyük cedveli Rusiye ordusınen cenkleşmek mümkün olğanını, onı muvafaqiyetnen yoq etmek mümkün olğanını köstere. Şimdi ketken esnasnıñ finalı mantıqlıdır: Ukraina halqı, Ukraina silâlı quvetleri istilâcı devletni ve onıñ siyasiy quvetlerini yeñecek».
MALÜMAT: Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
