Avgustnıñ 3-ünde öz-özüni yaqmağa tırışqan qırımlı Vatan Karabaş, 6-ncı şeer hastahanesiniñ yanıq bölügine yatqızıldı dep haber ete Qırım.Aqiqatnıñ muhbiri.
Ekimler onı baqıp çıqacaq, şimdilik onıñ sağlıq alı aqqında tefsir bermeyler.
“Ekimler, o eki-üç kün devamında özüne kelir, deyley”, - Qırım.Aqiqat muhbirine Karabaşnen hastahanege bargan “narazlıq meydanı”nıñ faalcisi Rinat Şaymardanov haber etti.
Diqqat! Tesir etici video!
Vaqıanıñ şaatları aytqanına köre, “acele yardım” maşnası adise olıp keçken yerge 10 daqqadan soñ keldi. Rusiye polisleri ise Vatan Karabaş özüni yaqqan vaqıtta iç bir şey yapmadı.
“Qırım akimiyeti bizden tamam böyle areket yapqanımıznı istey. Bu memurlar bizni ne alğa ketirgenlerini köresiñiz”, - dep olıp keçken adiseni tefsir etti Rinat Şaymardanov.
Vatan Karabaş evli ve üç balanıñ babası olğanı belli.
Avgustnıñ 3-ünde Aqmescitte “Strelkovaya” “narazlıq meydanı”nıñ faalcisi Vatan Karabaş öz-özüni yaqmağa tırıştı. O yanıcı şingenlik üstüne töküp, öz-özüni yaqtı. Amma yanında toplanğan adamlar aqaynıñ yanıp başlağan urbasını tez söndürdi. Yaquvdan evel, aqay akimiyetniñ zulum areketlerine qarşı öz-özüni yaqacağını ilân etti.
Qırımnıñ rusiye akimiyeti vekilleri qırımtatarlarnıñ evleri yerleşken topraqlarnı sata. Adet üzre, qurdurıcılar qora qoymasından başlay. Yerli sakinler ise buña qarşı narazlıq köstere.
Qırımtatarlar ev qurğan “Strelkovaya” “narazlıq meydanı”nıñ yerinde yañı 9 biñ adamlıq rayon qurmağa isteyler. Mesken evlerden ğayrı, mektepler, bala bağçaları, spor meydanları ve tükânlar qurmağa azırlanalar. Şimdilik anda esasen avdetçiler (repatriant) yaşay.
