Ukraina prezidentiniñ qırımtatar halqı işleri boyunca vekâletlisi Mustafa Cemilev AQŞ Devlet kâtibiniñ yardımcısı Wesley Mitchellden AQŞ-nıñ Qırım boyunca siyaseti Beyannamesini aldı. Beyanname bir kün evel yayınlanğan edi. Bunı iyülniñ 26-sına «Petro Poroşenko blogı»nıñ matbuat hızmeti haber etti.
Bildirgenlerine köre, AQŞ ziyaretinde Mustafa Cemilev ve Ukrainanıñ AQŞ-da elçisi Valeriy Çalıy Mitchellnen körüşti. O, Cemilevge ilân etilgen AQŞ-nıñ Qırım boyunca siyaseti Beyannamesini berdi.
Vesiqada «AQŞ, Kreml halqara uquqqa baqmadan ve küç ile işğal etilgen, topraqlarğa suverenitet istegenine, qarşı olğanını ğayrıdan tasdıqlay. AQŞ ittifaqdaşları, ortaqları, halqara topluluq ile birlikte, Rusiyeniñ Qırımnı ilhaq etip kirgenine qarşı olıp, Ukrainanıñ devlet bütünligini yañıdan tiklenüvininde qoltutacaqları» belgilene.
Bundan ğayrı, Mustafa Cemilev Wesley Mitchellge «işğal etilgen Qırımda insan aqlarınıñ şimdiki vaziyeti aqqında malümat berdi ve dünya topluluğını daa faal areket yapmağa» çagırdı.
İyülniñ 25-nde AQŞ-nıñ devlet kâtibi Mike Pompeo «Qırım beyannamesi»ni derc etti. Beyannamede AQŞ Qırım işğalini iç bir vaqıt qabul etmeycekleri bildirile. Pompeo, AQŞ ileride de Ukrainanıñ devlet bütünligini yañıdan tiklenüvini talap eteceklerini, bildirdi.
Rusiyeniñ Tışqı işler nazirligi, Pompeonıñ beyannamesi boyunca, AQŞ tış siyaseti daima deñişip turğanını belgiledi.
2014 senesiniñ mart ayında Rusiye Qırımnı işğal etti. Halqara teşkilâtlar işğalni qanunsız dep qabul etti ve Rusiyeniñ areketlerini takbih etti. Ğarbiy memleketler oña qarşı bir sıra iqtisadiy sanktsiyalar başladı. Kreml yarımada ilhaqını inkâr etip, buña «tarihiy adaletniñ tiklenmesi» dey.
