ABD Devlet kâtibi Mike Pompeo iyülniñ 25, çarşembe künü Birleşken Devletler Rusiye tarafından ilhaq etilgen Qırımnı iç bir vaqıt tanımaycaqı aqqında ayttı.
«Qırım beyannamesi» denilgen beyanatta Pompeo, ABD kelecekte de Ukrainanıñ topraq bütünligi üzerinde israr etecek dep ayttı. Onıñ sözlerine köre, Kremlniñ halqara uquqqa zıt kelgen şekilde elge keçirilgen territoriya suverenitetine olğan itirazını ABD evelkisi kibi tanımamağa devam etecegini ayttı. O, Rusiyeni «Qırım işğalini yekünlemege» çağırdı.
«İttifaqdaş, ortaq ve halqara cemaatçılıqnen beraber Birleşken Devletler Qırımnıñ Rusiyege qoşuv teşebbüsini inkâr ete ve Ukrainanıñ topraq bütünligi tiklengence işbu siyasetke qol tutmağa devam etüvni özü içün mecburiy dep saya», – dey Pompeo, Senatnıñ tış işleri Komitetinde şaatlıq yapmasından evel Devlet departamenti çıqarğan beyanatında.
Pompeonıñ beyanatında ayrıca, Rusiyeniñ areketleri «büyük milletniñ itibarını tüşüre ve o halqara cemaatçılıqtan izolâtsiya etilüv yolunı saylâdı» denilmekte.
İyülniñ 16-nda Helsinkide Trump ile Putinniñ körüşüvi keçti. Matbuat konferentsiyası esnasında Trump Ukraina aqqında bir söz bile aytmadı, albuki körüşüvden evel, taraflar deger mevzularnen bir arada Ukraina meselesini de muzakere etilecek denilgen edi. Matbuat konferentsiyasından soñ, ABDde Trump tenqitke oğradı.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
