Avropa ve Avrasiya meseleleri boyunca AQŞ devlet kâtibiniñ yardımcısı Wesley Mitchell qırımtatar halqı meseleleri boyunca Ukraina prezidentiniñ vekâletlisi, halq deputatı Mustafa Cemilevnen körüşti dep haber ete Twitterde, Ukraina işleri boyunca AQŞnıñ hususiy temsilcisi Kurt Volker.
Onıñ sözlerine köre, Mitchell Cemilevnen AQŞ devlet kâtibi Mike Pompeo çıqarğan Qırımnıñ ilhaqı tanılmaycağına dair beyanatını muzakere etkenler.
Volker ilâve etkenine binaen, Cemilev ilhaq etilgen Qırımda «insan aqları deşet alda» olğanı içün halqara cemaatçılıqnı «ziyade şeyler yapmağa» çağırdı.
Cemilev Mitchellnen ötkergen körüşüvini daa izaatlamadı.
İyülniñ 25-nde AQŞ devlet kâtibi Mike Pompeo, Qoşma Ştatlar Rusiye ilhaq etken Qırımnı iç bir vaqıt tanımaycağı aqqında yazılğan «Qırım beyannamesi» yayınladı. Pompeo ileride de Ukrainanıñ topraq bütünligi tiklenmesinde israr etecek dep ayttı.
Rusiye TİN Pompeonıñ beyannamesini izaatlar eken, AQŞnıñ tış siyaseti istiqrarsız olğanı aqqında ayttı.
2014 senesi mart ayında Rusiye Ukrainağa bağlı olğan Qırım yarımadasını ilhaq etti. Halqara cemaatçılıq Qırımnıñ ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.
