Rusiye Devlet duması soñki oquvdan soñ ana tillerge dair qanun leyhasını qabul etti. Vesiqağa binaen, «Ana tili» feni kirsetilgen mektep programmalarında, onıñ ögrenilüvi mecburiy olıp qalacaq, lâkin bu arada muayyen bir tilni ana tili olaraq saylâmağa imkân berilecek.
Vesiqada, Rusiyeniñ mecburiy tasil standartları «Rusiye halqları arasında ana tilinde tasil aluv, Rusiye cumhuriyetlerindeki devlet tilini ögrenüv, Rusiye halqlarınıñ tilleri arasındaki ana tillerni ögrenüv, şu cumleden ana tili sıfatında rus tilini ögrenüv imkânını» teminley denilmekte.
Ayrıca «tasil almaq içün serbest olaraq Rusiye halqlarınıñ tilleri arasında ögrenilgen ana tilini, şu cumleden ana tili sıfatında rus tilini, Rusiye cumhuriyetleriniñ devlet tili olğanlardan birini saylâma» aqqı tanıla.
Mevzunen bağlı olaraq: Vatanda ana tili olmadan: Qırım mekteplerinde qırımtatar tiliniñ ögrenilüvine mania çıqarıla
Vesiqağa köre, talebeler ögrenecek tilni saylâma imkânı ana-babalarğa berile. Rus tili Rusiyeniñ bütün mekteplerinde mecburiy fen olaraq qalmağa devam etecek.
Tataristan ve Başqortistan kibi Rusiyeniñ bazı cumhuriyetleri tanqit etken soñ, qanun leyhası bayağı deñiştirildi.
İlhaq etilgen Qırımnıñ rusiyeli memuriyeti orta tasilli mekteplerde qırımtatar ve ukrain tillerine ayırılğan saatlarnı minimumğa endirdi. Qırımtatarlar mekteplerde ana tilini ögrenüv imkânından marum etilgeni aqqında Qırımtatar Milliy Meclisiniñ temsilcileri de aytqan edi.
Albuki, yarımada ilhaqından soñ, yarımadada qabul etilgen «Qırım Cumhuriyetiniñ Anayasası»nıñ 10 maddesine binaen qırımtatar, ukrain ve rus tillerine devlet tili statusı berile.
