Aluştadaki Qırımtatar Milliy Meclisiniñ sabıq reisi Enver Arpatlı Rusiyedeki Qaraçay-Çerkes cumhuriyetiniñ akimiyeti reisiniñ muavini vazifesine tayin etildi. Anda o, Rusiye cumhuriyetiniñ İqtisadiy inkişaf ve Sanayi ve ticaret nazirlikleriniñ işini nezaret etecek. Söz kelimi, Enver Arpatlı Qırımtatar Milliy Meclisi reisi muavini Ahtem Çiygoznıñ işi boyunca şaat edi.
«Ölüm ketirgen» trassa
Kerç trassasında dört avtomobilniñ iştiraki ile olğan yol qazasında yedi kişi elâk oldı. Olarnıñ dörtü balalar. Daa eki passajir reanimatsiyada buluna. Qırım sakinleri, bu trassada muntazam surette qazalar olğanına şikâyet eteler. Yol tar. Yük maşinaları bu yolnen Rusiyeden Qırımğa muntazam surette mallar ketire. Yol qazalarınıñ muhtemel sebepleri aqqında bu yerde oquñız.
«Özüni qorçalav rejimi»
Er bir kişi «ekstremist» tayin etile bilecek ilhaq etilgen Qırımda özüni nasıl qorçalamaq mümkün ve ne içün «Vkontakte»deki öz saifeñni alıp taşlamaq daa yahşı? Nasıl etip özüñni Rusiye propaganasından muafaza etmek ve aynı zamanda «konservatsiya»ğa oğramamaq? Ukraina vatandaşlarına vaqtınca işğal etilgen territoriyalarda neni unutmamaq kerek, ve Ukraina vatandaşlarını qorçalamaq içün neler yapa bile – bu hususta aq-uquq qorçalayıcısı Yevgeniya Andreyuk ile intervyüde aytıla.
Çempionnıñ treneri
Ukrainanıñ lıja (kayak) canbazı Aleksandr Abramenko, Ukraina fristaylnıñ tarihında birinci mukâfat ve Phençhan Olimpik oyunlarında birinci altın medalni qazandı. Onıñ treneri – Enver Ablayev – bu sport çeşitini Ukrainada temsil etken yekâne qırımtatardır. Qırım.Aqiqat içün bergen intervyüde o, sporttaki karyerası aqqında ikâye etti.
Siz rezidentsiñiz, lâkin bu tam böyle degil
Ukrainanıñ «Qırım» azat iqtisadiy zonası aqqında qanunı 2014 senesinde bütün Qırım sakinlerini Ukraina bank sistemasınıñ rezidentleri statusından marum etti. Bu norma ale daa işley. Mecburen köçken şahıs vesiqası Qırım sakinlerine rezident statusını qaytarsa da, bazı banklar qoşumça vesiqalarnı talap etmege devam ete ya da Qırım sakinleriniñ bank esaplarını blok eteler. Bunıñ qanuniy esası barmı ya da yoqmı, Qırım.Aqiqat Radiosı efirinde muzakere etildi.
Qısqadan
Rusiye sıñırcıları Ukraina vatandaşını Qırımdan çıqqan vaqtında yaqaladılar.
Umumrusiye cemiyet fikrini ögrenüv merkezi (VTsİOM), Qırım sakinleriniñ 88%-i «ayatından memnün», dep iddia ete.
Britaniya gazetası «Qarılğaç yuvası»nı dünyanıñ eñ romantik binalar cedveline kirsetti.
Moskva ve Sankt-Peterburgda qırımtatarlarğa qol tutuv ve Qırımda saylavlarğa qarşı piketler ötkerildi.
Eñ soñunda bir video
Yaltadaki «Hizb ut-Tahrir işi» figurantlarınıñ aqrabaları, zalğa yiberilmeyceklerini bilip, kene de Qırım Garnizon mahkemesi yanına keleler.
