Link açıqlığı

Saatnıñ esas haberi

Türkiyede qırımtatar milliy areketiniñ veteranı Veciye Kaşkağa bağışlanğan dua keçirildi


Veciye Kaşka, arhivden alınğan fotoresim
Veciye Kaşka, arhivden alınğan fotoresim

Yanvarniñ 5-nde İstanbulnıñ (Türkiye) Qırımtatar medeniyet ve yardımlaşma Derneginiñ Merkeziy ofisinde qırımtatar milliy areketiniñ veteranı Veciye Kaşkağa bağışlanğan dua ötkerildi, dep haber ete Facebookta Qırım birdemligi birleşmesiniñ faalleri.

Musafirlerge soñki sefer İstanbulnı ziyaret eter eken, uzun bir zaman qırımtatar diasporasınıñ yardımınen tedavi körgeninde çekilgen Veciye Kaşka monolog-filmi numayış etildi.

«Film numayışından soñ imam dua oqup, musafirlerge muracaat eterek, insanlar biri-birine qol tutmaq ve ümmet içün qaviy iman örnegi olaraq İslâm qanunlarına uymaq kerek olğanını hatırlattılar. O, bütün müsülmanlar peyğamber Muhammed (s.a.v) ümmetinden olğanı ve bir yerlerde olarnıñ dindaşları basqı ve aşalavğa oğrap, öldürilgende bir kenarda turması yañlış olğanını hatırlattı», – denilmekte faallerniñ haberinde.

Tedbirniñ musafirleri Veciye Kaşka aqqındaki hatırlavlarınen paylâştı, yardım ve qoltutuv aqqında söz yürsettiler.

Veciye Kaşkağa bağışlanğan dua merasimi Qırımda yanvarniñ 2-nde ötkerilgen edi.

Noyabrniñ 23-nde Aqmescitte küç idaresiniñ hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini tutıp alğan ediler. Olar Türkiye vatandaşından para talap etüvde qabaatlandı.

Qırımtatar faalleri tutulğan vaqıtta qırımtatar milliy areketiniñ veteranı Veciye Kaşka yaramay. Daa soñra qadınnıñ vefat etkeni aqqında belli ola.

Esas Ukrainada yerleşken Qırım MC prokuraturası ötkerilgen qanunsız tintüv, insanlarnıñ tutup alınuvı ve qırımtatar milliy areketiniñ veteranı Veciye Kaşkanıñ ölümi boyunca cinaiy iş açqan edi

Veciye Kaşka – qırımtatar milliy areketiniñ veteranı. O, 1934 senesinde Aluştağa yaqın yerdeki Üsküt (Privetnoye) köyünde doğa. 1944 senesi qırımtatar halqı sürgün etilgen soñ, Veciye Kaşka qorantasınen beraber Özbekistanda yaşay. 50-nci yıllarda o, ömür arqadaşı Bekirnen beraber qırımtatar milliy areketine qoşula.

XS
SM
MD
LG