Büyükbritaniya Baş Naziri Tereza Mey, Qırımnıñ ilhaqını qanunsız ve Avropada bir mustaqil halq tarafından başqa bir mustaqil halqqa ait topraqnı zornen alınmasınıñ II Cihan Cenkinden soñ ilk vaqiası, dep saya.
Bu hususta o, tünevin London Siti lord-meri bergen ziyafetinde söyledi, dep bildire Reuters.
Ondan ğayrı Mey, Qırımnıñ ilhaqından soñ Rusiye «Donbassta çatışma başlattı, defalarca bir qaç Avropa devletiniñ ava boşluğı sıñırlarını bozdı ve muntazam surette kibercasuslıq ve stabillikni bozuv kampaniyasını alıp bardı», dep qayd etti.
«Bu kampaniya, Daniyadaki saylavlarğa qarışuv, Mudafaa nazirligi ile Bundestag saytlarını zornen açuv ve başqa amellerden ibarettir. Olar haberlerni bir silâ olaraq qullanmağa tırışalar», – dep qayd ete baş nazir.
Ondan ğayrı Büyükbritaniyanıñ baş naziri Tereza Mey, Rusiyeniñ Ğarp ülkeleri arasında bozuqlıq yapmağa yönetilgen ğayretleri, ittifaqdaşlarnı Moskvanıñ ucumlarına qarşı tirenmek içün beraber çalışmağa mecbur eteler, deye bildirdi.
Rusiye tarafından bu sözlerge dair iç bir izaat açıqtan bildirilmedi.
Meyniñ nutqı, Vladimir Putinnen Vyetnamda körüşken soñ, Rusiyeniñ AQŞ-taki 2016 senesi saylavlarına qarışmağanını aytqan meslekdaşına inanğanını bildirgen AQŞ prezidenti Donald Trampnıñ soñki sözlerine zıt kele.
2014 senesi martnıñ 16-sında Qırım ve Aqyar şeeriniñ territoriyasında yarımadanıñ statusına dair dünya tarafından qanuniy olaraq tanılmağan referendum ötkerilip, neticesinde Rusiye Qırımnı öz toprağına ilhaq etti. Referendumdaki rey berüvniñ neticelerini ne Ukraina, ne Avropa Birligi, ne de AQŞ tanıdı. Martnıñ 18-nde Rusiye prezidenti Vladimir Putin Qırımnıñ Rusiyege «öz isteginen qoşulğanını» ilân etti.
Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.
