Rusiyeniñ, dünyada olmağan SSCB devletiniñ qanunlarını ve şu cümleden Qırımnıñ Ukrainağa alıp berilmesi hususında 1954 senesi qararını lâğu etmege aqqı yoq. Bunı Radio.Qırım.Aqiqat efirinde uquqçı, halqala uquq boyunca mutehassıs Roman Şahmatenko ayttı.
«Başta Siyasiy Büronıñ qararı alındı, soñ SSCB Yuqarı Şurası Prezidiumınıñ fermanı çıqtı, soñ buña Ukraina SSC Yuqarı Şurası razılıq berdi. Bundan soñ Qırımnıñ alıp berilmesi qanun ile tasdiqlandı. 1936 senesi Sovet anayasasına binaen Sovet Birliginde SSCB Yuqarı Şurasınıñ resmiy vesiqasını lâğu ete bilecek organ yoq edi. O zaman Anayasa mahkemesi yoq edi», – dedi uquqçı.
Böyle bir resmiy qararnı lâğu etmege imkân bergen yekâne mehanizm – SSCB Yuqarı Şurasınıñ qanunıdır. 1991-den başlap böyle bir organ yoq, dep bildire Şahmatenko.
Ekspert, «Rossiyanıñ, dünyada olmağan devletniñ qanunlarını lâğu etmege aqqı yoq» şeklinde yekün çekti.
Rusiye Devlet Dumasınıñ vekili Konstantin Zatulin noyabrniñ 6-8 künleri arasında Yaltada keçken «Qırım dostlarınıñ forumı»nda, Qırımnıñ Ukraina SSC terkibine alıp bergilmesi hususında SSCB Yuqarı Şurası Prezidiumınıñ qararını lâğu etmek teklif etti.
Qırım parlamenti başlığınıñ muavini Remzi İlyasov ve Federatsiya Şurası yanındaki halqara işleri boyunca komitetiniñ Qırımdan vekili Sergey Tsekov onıñ fikrine qoşuldılar.
Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña “tarihiy adaletniñ tiklenmesi”, dey.
