Link açıqlığı

Uquq qorçalayıcı: Ukraina BMT (OON) insan aqları Şurasında –qırımlılarnı qorçalamaq içün bir platforma


Ukrainanıñ 2018-2020 seneleri içün BMT (OON) insan aqları Şurası terkibine saylânması – işğal etilgen Qırım ve işğal altında bulunğan Donbass sakinlerini qorçalamağa imkân berecek. Böyle bir fikirni Qırım.Aqiqatqa bergen izaatında Qırım uquq qorçalama gruppasınıñ yolbaşçısı Olga Skripnik bildirdi.

«Qırım ve Ukraina şarqındaki çatışma zonasında insan aqlarınıñ qorçalanmasınen bağlı meselelerni kötermek ve devam ettirmek adına - bu Ukraina içün kerçekten de pek muim bir meydan. Eñ muimi de şudır ki, bu devlet olaraq Ukrainanıñ insan aqlarını qorçalaması içün bir nevi mukâfattır», – dedi Skripnik.

Onıñ sözlerine köre, artıq Ukraina insan aqlarınıñ bozulmasınen alâqalı konkret şikâyetlerni baqıp, başqa devletlerge tevsiyeler bermege imkânı olur.

«Bu organ farqlı devletler içün muayyen tevsiyeler şekillendire ve Ukraina, Şura azası olaraq, Rusiye Federatsiyasına tevsiyeler azırlap berebile. Ondan da ğayrı, Şura insan aqlarınıñ bozuluvınen bağlı konkret şikâyetlerni baqmağa imkânı olğanı ğayet muim şey. Bunıñ oña bağlı ayrı bir mehanizmi mevcut ve Ukraina da diger azalarnen beraber bu faktlarnı baqma fursatına saip olacaq», – dedi Skripnik.

Uquq qorçalayıcı BMT (OON) Şurası terkibine kirgen Ukraina, yalıñız Qırm ve Donbasstaki insan aqlarınıñ bozulmasınen bağlı meselelernen degil de, bütün dünyadakilerinen de oğraşacaq.

Oktâbrniñ 16-nda BMT (OON) General assambleyası Ukrainanı 2018-2020 seneleri içün BMT insan aqları Şurası terkibine kirsetti.

​Qırım işğalinden soñ, yarımadada hususan qırımtatarları ğayıp olıp başladı. Bu arada Rusiye nezaretindeki Qırım Taqiqat Komiteti «yarımadada qırımtatarları kütleviy bir şekilde ğayıp olmay» dey.

XS
SM
MD
LG