Link açıqlığı

Qırımtatar faili Karametovnıñ imayecileri apis müddetini para cezasına çevirmege talap ete


Server Karametov, arhivden fotoresim

Qırımtatar faili Server Karametovnıñ imayecileri oña berilgen memuriy tevqif cezasına qarşı itiraz bildirdi. Bunı avgustnıñ 10-nda Qırım.Aqiqatqa bergen izaatında adliyeci Lilâ Gemeci haber etti.

«Razı olmağanımız er şeyni, ceryannıñ bütün bozuvlarını itirazımızda bildirdik ve Karametovnıñ yaşı ve sağlığına dair inceliklerni işaretledik. Soñuna qadar, onıñ memuriy apis cezası cöremege çevirelecegine ümüt etermiz», – dedi Gemeci.

Onıñ sözlerine köre, Qırımda failler ve uquq qorçalayıcılar şimdi bu davanı keñiş surette aydınlatmaq içün bir sıra tedbir azırlamaqta.

Avgustnıñ 9-nda Kremlniñ kontrolünde çalışqan Aqmescit Demiryol rayon mahkemesi esli-başlı fail Server Karametovnı 10 künge apiske qapattı. Memuriy tevqifniñ sebebi «politsiya hatimlerine kösterilgen qarşılıq» olğan.

Bundan evel ise mahkeme onı Rusiye Memuriy cinayetler Kodeksiniñ 20.2 maddesine binaen, qabaatlı olaraq tanığan ve oña 10 biñ ruble (tahminen 4200 grivna) miqdarında para cezası tayinlegen.

Avgustnıñ 8-nde Aqmescitte, Ahtem Çiygozğa destek bildirmek maqsadınen keçirilgen yalıñız piket devamında tutılğan esli-başlı qırımtatar faili Server Karametovğa qarşı eki memuriy protokol tizilgen. Biri – «yalıñız piketlerniñ qaideleri bozulğanı» sebebinden, ekincisi – «politsiya hadimlerine qarşılıq kösterilgeni» içün.

Server Karametov işğal etilgen Qırımda bundan evel de tutıla edi. Mayısnıñ 18-nde, qırımtatar halqı genotsidiniñ hatıra kününde o Aqmescitte, qırımtatar milliy bayrağını ve 1944 senesi sürgünlik qurbanları olğan ana-babasınıñ fotoresimlerini alıp çıqqan edi, ve o arada yaqalandı. Üç saat soñra, oña qarşı memuriy protokol tizilgen soñ, o yiberilgen edi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG