Aqmescitte orta asırlarda Qalğa Sultan sarayı yerleşken topraqta qurucılıq işleri toqtatıldı. Bu aqta avgustnıñ 31-de Qırım müendislik-pedagogika universitetinde keçirilgen tögerek masada belli oldı, dep bildire Qırım ve Aqyar musulmanları diniy idaresiniñ (QAMDİ) matbuat hızmeti.
Qırımnıñ Rusiye devlet qurucılığı nezareti hızmetiniñ yolbaşçı vazifelerini eda etken Nariman İsayevniñ bildirgenine köre, qurucınıñ topraq vesiqaları bar. Şahsiy qurucılıqqa 2014 senesi onar sotkalıq üç topraq damartısı ayırılğan edi, 2015-2016 seneleri olar bütünley resmiyleştirildi. Lâkin qurucılıq izni daa yoq.
Qurucığa qarşı memuriy bozuv protokolı tizilip, qurucılıq toqtatılmasına dair beyanname berildi.
İyül ayınıñ ortasında Aqmescit sakinleri Qalğa Sultan sarayı toprağında qurucılıq işleri ğayrıdan başlağanını bildirgen edi.
Qalğa Sultan sarayındaki qurucılıq meselesi 2015 senesi mart ayında köterilgen edi. Qırım müftiyligi ve cemaatçılıq tarihiy kompleks yerinde qurucılıqnı toqtatıp, arheologik qazma işlerine başlamaq kerek, dep bildirgen ediler. QAMDİ Qırımnıñ Rusiye prokuraturasına muracaat etip, Aqmescit akimiyetiniñ bu topraqnı qurucılıq içün ayırğanını qanunğa uyğunmı-yoqmı dep teşkermege talap etken edi. 2015 senesi qurucılıq toqtatılğan edi.
2014 senesi Qırım Rusiye tarafından işğal etilgen soñ QAMDİ yapacaq areketlerini Meclis ile muzakere etmey. Yanvarnıñ 16-17-de Herson vilâyetiniñ Geniçesk rayonında olıp keçken Dünya qırımtatar kongressi icra şurasınıñ toplaşuvında esas Ukrainada Müftiylikni qurmağa qarar alındı. 2016 senesi noyabrniñ 19-da 14 qırımtatar din cemiyeti Kyivde toplaşıp müftiylik qurdı.
Qalğa – Qırım hanlığında handan soñ kelgen unvandır. Bu vazife I Mengli Geray han tarafından tesis etilgen edi. Bu vazifege ancaq Geraylar sülâlesinden şahzadeler keçken edi. Olarnı Qırımda sultan dep adlandırğanları içün qalğalarğa «qalğa sultan» dep ayta ekenler. Qalğanıñ iqametgâhı Aqmescit şeeri olğan edi.
