Ukraina prezidenti Petro Poroşenko Avropa birliginiñ rusiyeli ve ukrain vatandaşlarına ve uquqiy şahıslarğa qarşı Ukraina topraq bütünligini bozuv içün şahsiy sanktsiyalarnı devam ettirmek qararına qol tuttı. Bu aqta ukrain prezidenti Twitterde yazdı.
«Avropa birligi Şurasınıñ tecavuzcığa qarşı sanktsiyalarnı devam ettirmek qararına qol tutam. Avropa birliginen birdemlik deñişmez. Deñişmez destek ve Ukrainanen birdemlik tutuvı içün teşekkür bildirem», – dep qayd etti Poroşenko.
Sentâbr 15-te Avropa birligi Şurası 146 rusiyeli ve ukrain fizikiy ve 37 uquqiy şahısqa qarşı şahsiy sanktsiyalarnı yarım yılğa devam ettirdi.
Sanktsiyalar aktivlerni buzlata ve Avropa Birligine ziyaretler içün viza berilmesini yasaq ete, bular Avropa birliginde Ukraina topraq bütünligini bozuv ve mustaqilligine iddia içün mesüliyetli sayılğan teşkilâtlar ve şahıslarğa qarşı kirsetilgen.
Avropa birligi, 2014 senesinden başlap, bir qaç basamaqnen Moskvağa qarşı onıñ Ukrainağa nisbeten basqıncı siyaseti içün, yani Qırımnı işğal etkeni ve Donbassta Rusiye tarafını tutqan separatistlerge destek köstergeni içün sanktsiyalar kirsetti. Bu sanktsiyalar bir qaç sefer uzattırılğan edi, olar rusiyeli iqtisat saasında 2017 senesi yanvar ayında yekünlenecek.
Sentâbr başında Amerika Qoşma Ştatları Moskvanıñ Ukrainadaki vaziyetniñ kerginleşmesinde rolü içün sanktsiyalarğa oğratığan rusiyeli şirketler cedvelini eki kere kenişletti.
Amerika Qoşma Ştatları, Avropa birligi, «Yedi gruppası» aza devletleri ve daa bazı devletler Ukrainadaki vaziyetniñ kerginleşmesi ve Rusiyeniñ oña qarşı basqıncılığı munasebetinen, oña qarşı, hususan rusiyeli fizikiy ve uquqiy şahıslarğa qarşı, bunen beraber, Donbass ve Qırım separatistleri ve sabıq Ukraina yolbaşçılığı temsilcileri sırasından şahıslar ve müessiselerge qarşı bir sıra sanktsiya paketini kirsetti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
