UNESCO öz rezolütsiyasında Qırımnıñ Rusiye parçası, işğal etilgen Aqyardaki «Tavriya Hersonesi» müzey-qoruğınıñ rusiyeli olğanını tanımağan edi, dep ayttı Qırım.Aqiqat Radiosınıñ saba yayınında Ukraina medeniyet naziriniñ muavini Tamara Mazur.
Onıñ sözlerine binaen, rusiyeli kütleviy haber vastaları vesiqadan «delillerni muvafaqiyetli çıqardı» ve böyle etip malümatnı yañlış yaptı.
Mazurnıñ hatırlatqanına köre, Rezolütsiyada UNESCO Hersoneske teşkilâtnıñ Medeniy asabalıq saqlavı komitetiniñ missiyasınıñ ziyaretini teşkil etmege çağıra.
Nazir muavini qayd etti ki, UNESCO-da işğal etilgen Qırımnıñ rusiyeli statusını tanımağan ediler, amma medeniy-tarihiy obyektlerniñ alı aqqında malümatnı bütün irişile bilgen menbalardan almağa avale etti.
«UNESCO, kerçekten de, doğru qarar aldı ki, territoriyalarnıñ işğali vaziyetinde olar tek bizden malümat alsa, olmaz, çünki Ukrainanıñ obyektlerge kirmege musaadesi yoq, UNESCO missiyasını ise, aynı böyle işğal etilgen territoriyalarğa yibermezler», – dep qayd etti Mazur.
2015 senesi avgust ayında Rusiye prezidenti Vladimir Putin «Tavriya Hersonesi» Milliy qoruğınıñ abide ve territosiyalarını Rusiye halqlarınıñ medeniy asabalığı obyektleri Yekane devlet cedveline kirsetmege avale etti. 2015 senesi dekabr 7-de çıqarılğan prezident fermanınen «Tavriya Hersonesi» Rusiye Federatsiyası halqlarınıñ medeniy asabalığı pek qıymetli obyektlerinden biri olaraq belgilendi.
2013 senesi «Tavriya Hersonesi qadimiy şeeri» obyekti Ukraina teşebbüsinen UNESCO Bütün dünya asabalığı cedveline kirsetildi. UNESCO-da bu obyekt ukrain olaraq qayd etilgen.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
