Qırımda 1944 senesi Qırımdan qırımtatar halqınıñ sürgünligi qurbanlarınıñ hatırasına bağışlanğan Çatırdağ Seferi teşkil etildi.
Qırım ve Sevastopol şeeri musulmanları diniy idaresiniñ bildirgen malümatına binaen, merasimde üç binden ziyade insan iştirak etti.
Çatırdağ seferinden evel Qırım müftisiniñ muavini Ayder İsmailov qırımtatarlarnı «iç bir şeyge baqmadan, ruhtan tüşmemege ve er vaqıt beraber olmağa» çağırdı.
Bundan evel Meclis reberleri vatandaşlarnı bu merasimni boykot etmege, ve böyleliknen Rusiyeniñ yarımadada areketlerine sessiz narazılıq bildirmege çağırdı.
Stalinniñ emri ile 1944 senesi mayıs 18-20 künleri Qırımdan tahminen 200 biñ qırımtatar sürgün etildi. Olarnı Orta Asiya, Sibir ve Uralğa yolladılar.
Sürgünlikke bağışlanğan aktsiya numayış şeklinde Nijniy Novgorod şeerinde de keçirildi, dep bildire Azatlıq Radiosı. Merasim «Solidarnost» cemaat areketiniñ yerli bölügi tarafından teşkil etildi. Numayışta tahminen 10 insan iştirak etti, olar ellerinde Stalin repressiyalarınıñ ğayrıdan yapılmasına yol bermemege çağırğan şiarlarnı tuttı.
2016 senesi aprel ayınıñ soñunda Rusiye tarafından işğal etilgen Qırım ükümeti yarımadada Qırımtatar Milliy Meclisiniñ faaliyetini yasaq etti ve teşkilâtnı ekstremizmde qabaatladı. Amerika Qoşma Ştatları, Avropa Birligi, Ukraina ve Türkiye bu areketni takbih etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
