Link açıqlığı

Saatnıñ esas haberi

Mayıs 18-de aydavcılarnı üyle vaqtında sürgünlik qurbanlarını añmaq içün ses işaretini bermege çağıralar – Bariyev


Qırımtatar Milliy Meclisi mayıs 18-de, Sürgünlik qurbanları matem kününde keçirilecek merasimlerniñ planını tasdıqladı. Qırımtatar halqınıñ aq-uquqlarını qoruv boyunca komitetniñ idarecisi, Meclis azası Eskender Bariyev Qırım.Aqiqatqa bergen izaatında bildirgen malümatqa köre, esas hatıra merasimleri Kiyevde teşkil etilecek, paytahtqa Ukrainanıñ 8-den ziyade şeeri destek kösterecek.

Bu kün Meclis aydavcılarnı – Qırım ve qıtaiy Ukrainanıñ sakinlerini – üyle vaqtında sürgünlik qurbanlarını añmaq içün ses işaretini bermege çağıra.

«Mayıs 18-de, saat 12:00-de sürgünlik qurbanlarını añmaq içün ses işaretini bermek çağıruvı, naqliyede ketken er kes ses işaretini berip olsun. Bundan da ğayrı, adamlar sürgünlik qurbanlarına bağışlanğan abidelerge kelip, anda çiçekler qoysın, timsallerni qullansın. Qırımtatarlarğa qol tutqan bütün ukrainlerni bu kün saat 12:00-de avtomobilleriniñ ses işaretlerini bermelerini çağıramız», – dedi Bariyev.

Qırımtatar Milliy Meclisiniñ reis muavini Nariman Celâlnıñ tahminlerine köre, Rusiyege boysunğan Qırım ükümeti yarımadada Qırımtatar halqı sürgünliginiñ qurbanlarını añma kününe bağışlanğan kütleviy merasimlerni keçirmege bermeycek.

Qırım.Aqiqatqa bergen izaatında o qırımtatarlar ep bir ükümetke matem mitingini keçirmek içün ariza bereceklerini bildirdi.

Qırım qamaçavı aktsiyasınıñ ştab yolbaşçısı Lenur İslâmovnıñ bildirgenine köre, mayıs 18-de matem mitingi Qırım ile memuriy sıñırda da, «Çonğar» nezaret noqtasınıñ rayonında keçirilecek.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

2016 senesi aprel ayında Rusiyege boysunğan Qırım Yuqarı mahkemesiniñ qararınen yarımadada Qırımtatar Milliy Meclisiniñ faaliyeti yasaq etildi. Bu qararnı lâğu etmek içün bir ay devamında muracaat etmek mümkün.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG