Qırımtatarlarnıñ sürgünlik qurbanlarını añma kününde Qırım qamaçavında miting keçirmege planlaştıralar. Bu aqta Qırım.Aqiqatqa Qırım qamaçavı aktsiyasınıñ ştab yolbaşçısı Lenur İslâmov bildirdi.
Onıñ sözlerine binaen, mitingler Ukrainanıñ diger şeerlerinde de keçirilecek, amma Herson vilâyetindeki Geniçesk rayonında Qırım ile memuriy sıñırda yerleşken «Çonğar» nezaret noqtası yanında eñ büyük mitnigniñ keçirilmesi planlaştırıla.
«Ukrainanıñ çoq vilâyetinden qırımtatarlar bu yerde toplaşacaq. Mayıs 18-de qamaçavda büyük miting teşkil etmege planlaştıramız. Qırımdan çoq insan kelecek. Yarımadada 18 mayıs kününi keçirmege imkân bermeyler, ve Meclis imkânları olğan adamlar bu yerge kelip, Qırımda aytıp olamağanlarını mında aytacaqları aqqında qarar aldı», – dedi Qırım qamaçavı aktsiyasınıñ ştab yolbaşçısı.
O, faallerniñ çeşit türlü provokatsiyalarnıñ mümkün olmasını tahmin etkenlerini ve olarğa azır olğanlarını bildirdi.
«Bizim içün bu adiy bir kün degil. Bu kün beraberlikte ölgen qırımtatarlarnı añamız, bu nesillerimizniñ taqdirlerini sındırğan faciadır. Men özüm sürgünlik yerinde doğdım, amma vatanımda doğmaq kerek edim», – dep ayttı Lenur İslâmov.
2015 senesi sentâbr 20-de, Qırımğa mahsulat ve malnı alıp ketken yük naqliyeni blok etüv boyunca qırımtatarlarnıñ liderleri teşebbüsinen keçirilgen müddetsiz aktsiyası başlandı. 2016 senesi yanvar ayı ortasında, teşkilâtçılarnıñ sözlerine köre, Qırım qamaçavı boyunca aktsiyanıñ şekli deñişti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
