Qırımtatar Milliy Meclisiniñ reis muavini Nariman Celâlnıñ tahmin etkenine köre, Rusiyege boysunğan Qırım ükümeti qırımtatar halqınıñ sürgünligi qurbanlarını añma kününe bağışlanğan kütleviy aktsiyalarnı yarımadada keçirmege bermez.
Qırım.Aqiqatqa bergen izaatta o, qırımtatarlar matem mitingini keçirmek içün ep bir ükümetke ariza bereceklerini qayd etti.
«Biz ariza bermege tırışacaqmız, amma, elbette, onı red etecekler. Esas merasimler Qırımdan tış keçirilecek. Yarımadada ameldeki ükümet öz merasimlerini keçirmege tırışacaq, biz mania olmaycaqmız, yapsınlar, amma şahsen men bularda kimseniñ resimi yapılması içün iştirak etmeycem», – dedi Celâl.
Nariman Celâl ariza Meclis adından degil de, şahsiy şahıs adından berilecegini qayd etti. Onıñ sözlerine binaen, Meclis öz tarafından sürgünlik qurbanlarına bağışlanğan abideler yerleşken rayonlarda merasimlerni keçirmege tevsiye etecek, bu çiçek qoyulması ve dualar olacaqtır.
«Soñki eki yıl, bizim hatıra merasimlerini keçirmek er angi ıntıluvlarımız ükümet tarafından bütünley red etilgenini ya da bu merasimlerni ükümet tarafından keçirmek içün ıntıluvlar yapılğanını kösterdi. Keçken sene (Qırım ükümetiniñ– QA) açıqağızlığı sebebinden biz bazı rayonlarda mitinglerni ya da diger merasimlerni keçirip oldıq. Bu sene böyle areketlerimizge yol bermeycekler, daa qattı olacaqlar, yaqında Meclis faaliyetiniñ yasaq etilmesini de köz ögüne alsaq, bu qarar daa işke tüşürilmedi, amma yerli ükümet içün o işke tüşürilgen kibidir», – dep qayd etti Celâl.
Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.
Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.
Kiyevde ve bütün Ukraina boyunca bir sıra merasimler teşkil etilecek: kütleviy mitingler keçirilecek, mekteplerde qırımtatar halqınıñ sürgünligine bağışlanğan dersler berilecek ve ilâhre.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
