Mayıs 18, qırımtatar halqınıñ sürgünligi matem künü Ukraina boyunca hatıra merasimleriniñ teşkil etilmesi planlaştırıla. Esas merasimler Kiyev merkezinde, Mustaqillik meydanında keçirilecek.
Bu aqta Qırım.Aqiqatqa qırımtatar halqınıñ aq-uquqlarını qoruv boyunca Komitetiniñ idarecisi, Meclis azası Eskender Bariyev bildirdi.
«Mayıs 18-de, saat 19:00-dan saat 21-22-ge qadar Kiyevde Mustaqillik meydanında sürgünlikniñ 72 yıllığına bağışlanğan miting keçirilecek. Biz endi Kiyev şeer memuriyetine ariza berdik. Bundan da ğayrı, Herson vilâyetindeki Geniçesk rayonında, Lvovda, Çerkassı şeerinde merasimlerniñ keçirilmesi planlaştırıla. Mayıs 11-de tögerek masa keçirmek ve «Haytarma» filmini taqdim etmek teşebbüsi bar, yerli kütleviy haber vastalarında çıqışlar planlaştırıla. «Yüregiñde çıraq yaq» ananeviy aktsiyası da keçirilecek», – dep bildirdi Eskender Bariyev.
Onıñ malümatına binaen, Kiyev mekteplerinen de iş alıp barıla, bu yerde bu mevzuğa bağışlanğan dersler bermege planlaştıralar, bunıñ içün faaller mahsus sergi ve ocalar içün yardımcı malümatını azırlay.
Bundan evel Qırım qamaçavı aktsiyasınıñ ştab yolbaşçısı Lenur İslâmov mayıs 18-de matem mitingi Qırım ile memuriy sıñırda da, «Çonğar» nezaret noqtası rayonında keçirilecegini bildirdi.
Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.
Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.
2016 senesi aprel ayında Rusiyege boysunğan Qırım Yuqarı mahkemesi Qırımtatar Milliy Meclisiniñ faaliyetini yarımadada yasaq etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
