Mart 27 künü, Kiyev şeherinde, «Docudays UA» adlı insan uquqları aqqında vesiqalı filmleriniñ halqara festivali çerçivesinde, «Entsiklopediya Maydana» adlı tsiklniñ üç qısqa filmi kösterilecek. Olarnıñ bir parçası «Krım SOS» aqqındadır. Filmlerniñ rejissörı - Sergey Lısenko.
«Rusiye işğaliniñ birinci künü yarımada sakinleri, Qırım boyunca kerçek ve teşkerilgen haberlerni bildirmek içün, internette «Krım SOS» adlı gruppanı teşkil ettiler. Şimdiki vaqıtta, «Krım SOS» acele gumanitar, uquqiy, psihologik yardımınen temin etken, Qırım qaytarılması içün küreşken gruppanı taqdim etmekte», - dep aytıla filmniñ tasvirinde.
Kiyevde «Docudays UA» adlı 13 halqara festivali açıldı. Merasim «Kiyev», «Kinopanorama» ve «Kino evinde» keçirilip, aprel 1 kününe qadar devam etecek.
Mezkür festivalde 43 memleketten 93 film taqdim etilecek. Umumen, tedbirde 140 insan iştirak etecek, olarnıñ 60 - şı ecnebiylerdir.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
