Qurultaynıñ İcra Komiteti reisi Zair Smedlâyev bildirgenine köre, mart 23 künü Sudaq şeherinde qırımtatarlarğa qarşı provokatsiyalar keçirilecek. Bu aqta o, Qırım.Aqiqat agentligine haber etti.
«Elde etkenimiz malümatlarğa köre, Alçaqta bir sıra inşaatnı yıqtarmaq isteyler... Bu binalarğa 10 ziyade senedir. Tünevinki Patruşevniñ ve Şaygunıñ kelüvi, sanki qırımtatarlarnı ellerine silâ almağanına qadar eriştirmek, açuvlarını çıqarmaq, bundan soñ ise, olarğa qarşı kerekli tedbirlerni keçirmeknen bağlıdır», - dep qayd etti o.
Smedlâyevniñ sözlerine binaen, Rusiye nezareti astında bulunğan Qırım akimiyeti, qırımtatarlarnı ellerine silânı almağa tarik etmekteler. «Çünki biz silânı alsaq, olar qırımtatarlarğa qarşı daa radikal areketlerni kerçekleştirecekler».
Bundan evel Smedlâyev, feysbukta yazğanı kibi, Sudaqnıñ qırımtatar toplu yaşağan Alçaq massivinde, Rusiye qanunları boyunca resmiyleştirilmegen evlerni yıqtıracaqlar.
Kreml nezareti astında bulunğan Qırım akimiyetiniñ saytında bu vaqianen bağlı iç bir malümat berilmey.
Tintüv arfesinde Rusiye telükesizlik Şurasınıñ yolbaşçısı Nikolay Patruşev keçirilgen toplaşuv devamında, yarımadada vaziyetniñ destabilizatsiya havfı üküm sürgeni aqqında bildirdi.
Mart 22 künü, Qırımda Qurultaynıñ üç delegatınıñ evlerinde tintüv keçirildi. Aynı bu künü Rusiye Federatsiyasınıñ telükesizlik naziri Sergey Şoygu yarımadağa iş ziyareti ile keldi.
Halqara cemaatçılıqlar bir çoq kere Rusiye tarafından işğal etilgen Qırımda insanlarnıñ, daa çoq qırımtatarlarnıñ aq-uquqları bozulğanları aqqında aytıp, Moskvanı böyle bozuvlarnı toqtatmağa çağırdılar. Rusiye nezareti astında bulunğan Qırım akimiyeti mezkür arizalarnı "ziyade arttırılğan" kibi saymaqta.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
