Rusiye nezareti astında bulunğan Keriçniñ işnen temin etüv merkeziniñ destegi ile çıqqan «Rabota v Kerçi» adlı Qırım saytı, Keriç köprüniñ qurulışına 146 işçi kerek olğanı aqqında bildirdi.
Berilgen malümatlarğa köre, daimiy işke müendisler, montajnikler, gaz-elektrik qaynaqçıları, teftişçiler davet etilmekte. Maaş ihtisasqa köre, 18 biñden 40 biñ rublege qadar olacaq.
Qırım.Aqiqat agentligine haber etilgeni kibi, Keriç köprüsiniñ leyhasında özüne işni tek qırımlılar degil de, Rusiyeniñ bir sıra şeher sakinleri muvafaqiyetsiz şekilde aramaqtalar.
Mart 18 künü Rusiye prezidenti Vladimir Pütin, Kubandan yarımadağa qurıla yatqan köprüniñ iş ketişatını ögrenmek içün Qırımğa kelgen edi.
Keriç boğazından köprüniñ qurılması kerekligi aqqında Pütin, ta 2014 senesi, işğalden soñ aytqan edi. Köpür leyhasınıñ baş podrâdçigi «Stroygazmontaj» şirketi oldı. Keriç boğazından keçecek köpürni 2018 senege qurmağa vade etmekteler.
2016 senesi yanvar ayınıñ soñunda, Rusiye akimiyeti Keriç köpüriniñ qurulışında keçikme aqqında ayttılar.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
