Link açıqlığı

Geniçesk – Ukrainanıñ qıtaiy qısmındaki bala bağçasında şimdilik yekâne olğan qırımtatar gruppasını açtılar. Qırımtatar gruppası qırımtatarlar toplu yaşağan Herson vilâyetiniñ Geniçesk rayonında açıldı. Tamır halqnıñ temsilcileri şimdiki esas vazife halq olaraq saqlanıp qalmaq, dep aytalar, yerli akimiyet ise buña elinden kelgeni qadar yardım etecegini bildire.

Qırımtatar tili ve medeniyetini ögrenecek gruppa Novoalekseyevka qasabasınıñ «Cereltse» bala bağçasında şekillendirildi.

Bala gruppasınıñ tantanalı açılış merasimini Herson vilâyeti ve Geniçesk rayonı devlet memuriyetiniñ vekilleri, qasaba reberligi, yerli meclis temsilcileri ziyaret etti.

Toplaşqanlar bir netice çıqardılar, bu tedbir – umumukrain vaqiası.

Qırımtatar gruppası Geniçesk rayonı devlet memuriyeti, tasil bölügi, Novoalekseyevkka qasabasınıñ şurası, yerli meclis ve bala bağçası hadimleriniñ yardımı ile açıldı.

Valentina Seçevaya
Valentina Seçevaya

«Ukrainada bir şey deñişmey aytqanlarğa inanmañız! Ukrainada müim bir deñişmeler ola. Eminim, bir-eki yıl keçse, mında qırımtatar balalarından ukrain balaları ve diger milletlerniñ balaları daa çoq olacaq. Menim fikirimce, bölecek şeyimiz yoq, ve beraber ögge adım atıp olurmız», – dep qayd etti Herson vilâyeti devlet memuriyeti yolbaşçısınıñ birinci muavini Valentina Siçevaya toplaşqanlar ögünde çıqışta bulunıp.

Geniçesk rayonı devlet memuriyetiniñ yolbaşçısı Aleksandr Vorobyev bildirdi ki, qırımtatar halqı içün qolundan kelgenini yapacaq. Onıñ muavini Gülnara Bekirova balalar ana tilini ögrensin dep, rayon devlet memuriyeti bütün ğayretni kösterdi, dep qayd etti.

O, balalıq çağınıñ vaqialarını közyaşlar ile hatırladı, çünki milliy urbağa kiyingen soñ babasını işten boşatqan ediler.

«Şimdi olğanından ğurur duyam. Biz o qadar maniadan keçtik... 1967 senesi Geniçesk rayonına keldik, 1981 senesi babam qırımtatar milliy qıyafetlerine kiyingenimni istedi. Ertesi kün babamnı ariza yazmağa zorlap, işten boşattılar. Er kes sebebini bile edi. Bir sıra mania oldı... Mında qırımtatarlarnıñ üçünci nesili. Tilimiz ve medeniyetimizni saqlap qalmaq içün elinden kelgenini yapmaq kerekmiz. Bizim vazifemiz – halq olaraq saqlanıp qalmaq», – dep qayd etti Bekirova.

İleride – qırımtatar medeniyetini saqlap qaluv programmasınıñ amelge keçirilmesi

İrina Popova
İrina Popova

Geniçesk rayonı devlet memuriyeti tasil bölüginiñ yolbaşçısı İrina Popova qayd etti ki, Qırımdan soñ, Geniçesk rayonı – eñ çoq qırımtatarı yaşağan yekâne rayondır.

Popovanıñ qayd etkenine köre, işbu tedbir – 2015-2016 oquv yılına vatandaşlarnıñ qırımtatar tilinde tasil aluv aqqını amelge keçirüv ve qırımtatarlarnıñ milliy ananeleri ve medeniyetini populârlaştıruv programmasınıñ bir qısmı.

O, Qırım.Aqiqatqa izaat berip, bunıñ kibi programmanı yapmaq qararı keçken aynıñ soñunda akimiyet organları, meclis vekilleri, tasil müessiseleri hadimleriniñ iştiraki ile keçirilgen «tögerek masada» qabul etilgenini añlattı.

Popovanıñ bildirgenine köre, mezkür programma çeşit türlü tedbirniñ keçirilmesini belgiley – «tögerek masa», seminar, ustalarnıñ dersleri, sergi ve kontsertler. Programma qırımtatar medeniyetiniñ festivali ile yekünlenecek.

«Novoalekseyevkanıñ «İvuşka» bala bağçasında qırımtatar tilini ögrenüv tögeregini teşkil etemiz. Rayonnıñ eki mektebinde qırımtatar tili ve edebiyatı fakultativ olaraq ögrenilecek. Ocalar ve qırımtatar tili ve edebiyatı dersleri olacaq mektep ve mektepten aldın müessiselerniñ hadimleri içün usuliy mesleatlar azırlanacaq. Mart ayında balalarnıñ iştiraki ile kontsert programması numayış etilecek. Soñra qırımtatar medeniyetiniñ festivalini keçirecekmiz», – dep ayttı tasil bölüginiñ reberi.

Bu gruppağa balasını bergen ana-babalar balalarğa ana tilini mektepten aldın müessisede ögrenmege imkân berilgeni içün teşekkürler bildirdiler.

Qırım.Aqiqat bildirgeni kibi, Qırımda qırımtatarlar ana tilinde tasil almaq aqqınıñ amelge keçirilmesinde qıyınlıqlarğa rastkeleler.

XS
SM
MD
LG