Dağ qobasında saqlanılğan Altın beşik aqqında Qırım efsanesiniñ bir qaç variantı bar. Onıñ resmi Manguptaki Teodoro prinsliginiñ tuğrasında yapılğan edi. Bazıları onı Graalniñ izsiz ğayıp olğan kasası ya da İsa peyğamber doğğan beşik dep sayalar. Altın beşik saqlanğan qoba ise ana qarını ola bile, o, balalarını duşmanlardan qorçalamaq içün içeri aldı, soñra da kene çıqaracaq. Bu em qırımtatarlarnıñ «ömür teregi», ve Qırımnıñ özü – tamır halqı – qırımtatarlarnıñ beşigi, vatan ve kelecek nesillerge berilecek oña olğan munasebet timsali, ğayrıdan tiklenüv, nesiller bağı, halq ananeleriniñ küçü, ad, namus, azatlıq ve mustaqillik sadıqlığıdır.
Altın beşikniñ Qırımdaki yeri aqqında bir sıra fikirler mevcut: Bağçasaray rayonındaki Kuçuk-Süren (Malosadovoye) köyü rayonında aynı adnı taşığan qoba, Çatırdağnıñ şimal etegindeki Binbaş Qoba, Büyük İsar dağı, Bor Qaya, Aq Qaya, Qaplı Qaya, Basman («insan ayağı basmaycaq yer»), Boyka ve digerleri. Yarımadadaki er bir regionnıñ sakinleri türbe olarnıñ toprağında olğanını tüşüngen ediler. Dağda uzaqtan kelgen sesler eşitilse edi, Altın beşik öz başına sallanğanını ayta ediler.
Efsanege köre, diger halqnı boysundırmaq ya da yaramay bir şey yapmaq niyeti ile Altın beşikni alacaq olğan birisi cezalanacaq
Keçken sene, Qırım işğal etilgen soñ, Rusiye askerleri olğan «yeşil adamçıqlar» Boyka dağınıñ etrafını sarıp, yerli sakinlerni uzaqlaştıra ve anda bir şey qıdıra ediler. Mında yaşağan qartlar Ekinci cian cenki vaqtında aynısını almanlar da yapqanını hatırladılar. Ezoteriklerniñ fikirince, Boyka dağı – Qırımnıñ Şambalasıdır. Söz sırası, bunıñ kibi aziz yerlerni tüşünmege acet yoq, olar öz sırlarını beklenmegen musafirlerden saqlarlar ve olarğa yaqın kelgenlerde deşet duyğusını doğura ve atta deli ete bileler. Eki diktatornıñ aynı çizgileri aqqında bir qaç kere aytılğan edi, bu sebepten hırsızlanğan Qırımda çeşit merasimler ile bağlı olğan er şeyge emiyet bergen Putinge «Qırım, dünya ve yarımadadaki munasebetler üzerinde üküm» timsali olaraq Altın beşikke beñzegen bir şeyniñ berilmesi tabiiy bir aldır. Asılında ise, daa bir «qara işaret» berildi: efsanege köre, diger halqnı boysundırmaq ya da yaramay bir şey yapmaq niyeti ile Altın beşikni alacaq olğan birisi cezalanacaq. Bu muqaddesatqa iç bir alâqası olmağan insanğa onı ediye etmek imkânsız.
Altın beşikniñ özü ise Qırım dağlarında eskisi kibi saqlana ve Qırımnıñ kerçek canlanmasını ve ilerilemesini bekley.
Elzara Beşuyli, bloger, qırımlı
«Bloglar» rubrikasında bildirilgen fikir-tüşünceler müelliflerniñ noqtaiy-nazarlarını aydınlatıp, muarririyetniñ baqışları ile aynı olmaması mümkün