Qırımtatar Milliy Meclisi fikrine köre, Qırımnıñ Rusiye akimiyetiniñ maqsadı – qırımtatarlarnıñ tarihiy hafızasını yoq etmek ve SSCB kommunistik rejimi ve stalinizm cinayetleriniñ aqlavıdır.
Bu aqta Qırımtatar halqınıñ sürgünligi 71 yıllığı munasebeti ile Meclisniñ bildirüvinde aytıla.
Bildirüvde qayd etilgeni kibi, yarımadada «akimiyet Stalinniñ şanına ve Qırımda onıñ hatırasınıñ ebediyleşüvine yönelgen areketlerniñ alğışlanılğanı körüne, yani qırımtatar halqınıñ şimdiki şaraitlerde aqlarını qorumaq iradesine basqı kösterile».
Vesiqada yarımada 2014 senesi mart ayında Rusiye nezareti altına keçkeninden soñ Qırımda olğan vaqialarnıñ hronologiyası berile – tintüv, sorğu, qırımtatar matbuat vasatalarınıñ qapaluvı, Meclis reisiniñ muavini Ahtem Çiygoznıñ yaqalanuvı ve ilâhre.
«Meclis qırımtatar halqınıñ genotsidi – 1944 senesi mayıs 18 künü sürgünliginiñ qurbanları hatırasına er bir qırımtatar ailesi, er bir vatandaşımızğa taziye bildire», – denile bildirüvde.
Temsiliy organ tarihiy havızanı ve halqına sadıqlığını saqlağan vatandaşlarğa, yerli ve regional meclisleriniñ azalarına, qırımtatar milliy areket faallerine. Qırımtatar cemaat teşkilâtlarınıñ temsilcilerine, musulman cemiyetlerine minnetdarlığını bildirdi.
«Qırımtatar Milliy Meclisi, qırımtatar milliy areketiniñ adetiy demokratik ve zulumsız ümdelerine esaslanıp. Qırımda qırımtatar halqınıñ aqlarını ileride de, halqara uquqiy qaidelerine köre, qorumağa azılığı aqqında bildire», – deyler Mecliste. Bazarertesi künü, mayıs 18-de, Qırımdan qırımtatar halqınıñ sürgünligi 71 yıllığı munasebeti ile Ukraina ve tışında bir sıra hatıra tedbiri keçirilecek.
Şu künleri Kiyev, Harkov, Herson, Lviv ve diger şeerlerde de bu kibi tedbirler keçirildi.
Er sene Qırımda sürgünlik yıllığı munasebeti ile kütleviy tedbirler, şu cümleden Aqmescit merkezinde matem mitingi keçirile edi. Amma Rusiyeniñ Qırımnı zapt etkeninden soñ Aqmescit merkezinde bu kibi tedbirlerni keçirmege yasaq ettiler.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
